कोतवाली पोलिसांकडून गुन्हेगारांचे सर्च ऑपरेशन! रात्री विनाकारण फिरणाऱ्या टवाळखोरांवर धडक कारवाया, दुचाकी चोर, अट्टल गुन्हेगार कारवाई दरम्यान ताब्यात!
नगर : महान्यूज लाईव्ह
वेळ रात्री साडेअकराची.. अचानक अनेक पोलीस रस्त्यावर उतरतात.. अन् काही सेकंदात तपासणीला सुरुवात करतात.. रात्री साडेअकरा नंतर फिरणारे टवाळखोर तसेच संशयित गुन्हेगारांचे सर्चिंग ऑपरेशन करतात.. यात खरोखरच काही गुन्हेगार सापडतात आणि एवढेच नाही तर गुन्हेगारीला उत्तेजन मिळू शकणाऱ्या रात्री उशिरानंतर सुरू असणाऱ्या दुकाने, स्टॉल, हातगाडी यांच्यावर कारवाई करतात..!
कोतवाली पोलिसांनी पोलीस ठाण्याच्या हद्दीत विविध ठिकाणी टवाळखोरांविरोधात मोहीम राबवली. रात्री उशिरा बस स्थानक परिसरात तसेच शहरात इतर ठिकाणी विनाकारण फिरणाऱ्या टवाळखोरांवर कारवाई करण्यात आली. रात्री अपरात्री विनाकारण फिरत असलेल्या मोटरसायकल चालकांना अडवून कोतवाली पोलीस चौकशी केली.
गुरुवारी रात्री (ता.४) पुणे बस स्थानक परिसरात उघड्यावर दारू पिणाऱ्या काही जणांना कोतवाली पोलिसांनी ताब्यात घेत कारवाई केली आहे. कोतवाली पोलिस ठाण्याच्या हद्दीत चौका- चौकात रात्री उशिरा फिरणाऱ्यांची कसून चौकशी करण्यात आली. गेल्या आठवड्यातच कोतवाली पोलिसांनी रात्री उशिरा शहरातून वाहन घेऊन जाणाऱ्या इसमाकडून तलवार जप्त केली होती.
माळीवाडा बसस्थानक, पुणे बसस्थानक व इतर चौकात रात्री विनाकारण मोटरसायकली वरून फिरणाऱ्यांना अडवून कोतवाली पोलिसांनी चौकशी केली. वाहनांचे नंबर पोलिसांकडून तपासले. या शोध मोहिमेत पोलिसांना जबरदस्तीने मोबाईल चोरणारे मारहाण करून लुटणारे काही गुन्हेगार सुद्धा हाती लागले. संशयितरित्या फिरणाऱ्या तीन चोरट्यांवर कारवाई करण्यात आली.
मोबाईल हिसकावणारा एक इसम पोलिसांनी अटक केला, तसेच सार्वजनिक ठिकाणी गोंधळ घालणाऱ्या नऊ जणांवर मुंबई पोलीस कायद्यान्वये कारवाई करण्यात आली. कोतवाली पोलीस ठाण्याचे पोलीस निरीक्षक चंद्रशेखर यादव हे स्वतः आपल्या अधिकारी आणि पोलीस जवान यांच्यासह रात्री उशिरापर्यंत पोलीस ठाण्याच्या हद्दीत गस्त घालत होते.
या मोहिमेत रात्री ११ नंतर उघड्या ६२ दुकानांवर कारवाई
यापुढे दुकाने, हॉटेल्स, टपऱ्या रात्री ११ नंतर उघड्या दिसल्यास कोतवाली पोलिसांकडून कारवाई करण्याचा इशारा देण्यात आला असून काल रात्री नियमाचे उल्लंघन करणाऱ्या ६२ लहान मोठ्या दुकानांवर कोतवाली पोलिसांनी चौकशी करून कारवाई केली. दरम्यान यानंतरही रात्री अकरानंतर दुकाने खुली ठेवल्यास कारवाई करण्यात येणार असल्याचे पोलीस निरीक्षक चंद्रशेखर यादव यांनी सांगितले.
महिला, सर्वसामान्यांकडून कारवाईचे स्वागत
कोतवाली पोलिसांच्या धडक मोहिमेमुळे महिला आणि सर्वसामान्य नागरिकांनी समाधान व्यक्त केले आहे. विनाकारण फिरणाऱ्या टवाळखोरांवर कारवाई करण्यात आल्याने महीला तसेच सर्वसामान्य नागरिकांना होणारा त्रास कमी झाला असून पोलीस ठाण्याच्या हद्दीत सुरक्षित वातावरण तयार करण्यासाठी कोतवाली पोलीस प्रयत्न करीत आहे.
विनाकारण त्रास देणाऱ्यांची माहिती द्या : पोलीस निरीक्षक यादव : सार्वजनिक ठिकाणी विनाकारण रात्रीच्या वेळेस गोंधळ घालणारे, दारू पीत बसणारे अथवा इतर बेकायदेशीर गोष्टी करणाऱ्यांबाबत माहिती द्यावी, त्यांच्यावर कारवाई करण्यात येईल. माहिती देणाऱ्यांची नावे गोपनीय ठेवण्यात येतील.
ही रात्रीची कारवाई पोलीस अधीक्षक राकेश ओला, अपर पोलीस अधीक्षक प्रशांत खैरे, उपविभागीय अधिकारी अनिल कातकडे यांच्या मार्गदर्शनाखाली पोलीस निरीक्षक चंद्रशेखर यादव, कोतवाली पोलीस स्टेशनचे अधिकारी राजेंद्र पिंगळे, विवेक पवार, गजेंद्र इंगळे, मनोज कचरे, मनोज महाजन, सुखदेव दुर्गे, पोलीस जवान योगेश भिंगारदिवे, अतुल काजळे, अमोल गाडे, सोमनाथ राऊत, सुजय हिवाळे, रियाज इनामदार, तनवीर शेख, गणेश धोत्रे, संदीप थोरात, प्रमोद लहारे, कैलास शिरसाठ, अभय कदम, सलीम शेख, अनुप झाडबुके, ईश्वर थोरात, राहुल शेळके, सुमित गवळी, अशोक कांबळे, शरद धायगुडे, राजेद्र पालवे, बिल्ला इनामदार, अशोक भांड, अशोक सायकल, प्रशांत बोरुडे यांनी केली.
