दौंड : महान्यूज लाईव्ह
आमच्याच दारूच्या भट्ट्यांची पोलिसांना का माहिती देता? याच्यावरून सुरू झालेला वाद दौंड तालुक्यातील कानगाव परिसरात एका महिलेला विष पाजण्यापर्यंत पोहोचला, मग या महिलेच्या कुटुंबियांनी देखील कसर सोडली नाही. समोरच्या घरातील महिलेचा विनयभंग केला.
कानगावातील या भांडणात दोन्ही गटातील प्रत्येकी एका जणावर पोलीस ठाण्यात पूर्वीच्या गुन्ह्यांची नोंद आहे. याप्रकरणी यवत पोलिसांनी दोन्ही गटातील 11 जणांविरोधात वेगवेगळे गुन्हे दाखल केले. यापैकी दोन महिलांसह चार जणांवर खुनाच्या प्रयत्नाचा गुन्हा दाखल केला असून, या चार जणांनी एका महिलेला विषारी औषध पाजल्याचा गुन्हा दाखल करण्यात आला आहे.
तर दुसरीकडे याच भावकीतील दुसऱ्या गटातील महिलेने देखील पोलिसांकडे फिर्याद दिली असून ज्या कुटुंबातील महिलेला विष पाजल्याचा दावा केला जात आहे, त्याच कुटुंबातील पुरुषांनी दुसऱ्या गटातील महिलेचा विनयभंग केला अशी फिर्याद या कुटुंबातील महिलेने यवत पोलिसांकडे दिली.
त्यावरून विनयभंगाचा व मारहाणीचा गुन्हा तीन महिलांसह सात जणांविरोधात पोलिसांनी दाखल केला आहे. या गुंतागुंतीच्या गुन्ह्यातील एका गटाच्या फिर्यादीचा तपास फौजदार नागरगोजे करत असून, दुसऱ्या गटातील फिर्यादीचा तपास पोलीस हवालदार श्री. बंडगर करीत आहेत.
