सोमेश्वरनगर : महान्यूज लाईव्ह
श्री सोमेश्वर सहकारी साखर कारखान्याने आजअखेर १२ लाख ११ हजार मेट्रीक टनाचे गाळप पूर्ण केले असून सरासरी ११.६१ टक्के साखर उतारा राखत १४ लाख ३ हजार साखर पोत्यांचे उत्पादन घेतले आहे. कारखान्याच्या सहवीज निर्मिती प्रकल्पातून ७ कोटी ९९ लाख ७ हजार ६७३ युनिटची वीजनिर्मिती केली असून ४ कोटी ३१ लाख ९७ हजार २१ युनिटची वीजविक्री केली आहे.
कारखान्याच्या आसवनी प्रकल्पातून ६७ लाख ५३ हजार ५१३ लिटर अल्कोहोल उत्पादन घेतले असून, ३२ लाख २० हजार ५९२ लिटरचे इथेनॉलचे उत्पादन घेतले आहे अशी माहिती सोमेश्वर सहकारी साखर कारखान्याचे अध्यक्ष पुरुषोत्तम जगताप यांनी दिली.
श्री.जगताप यांनी दिलेल्या प्रसिद्धीपत्रकानुसार कारखान्याकडे सभासदांचा व बिगर सभासदांचा नोंदलेला संपूर्ण ऊस तुटल्याशिवाय कारखान्याचा गाळप हंगाप बंद होणार नाही त्यामुळे सभासदांनी निश्चित राहावे.
कारखान्याच्या येत्या गाळप हंगामाकरता जाहीर झालेल्या लागवड कार्यक्रमास मुदतवाढ देण्यात आली असून यामध्ये ८६०३२, ८००५, १०००१, २६५,या जातीच्या रोप लागवडीस परवानगी देण्यात आली आहे. ही परवानगी मार्च अखेरपर्यंत सुरू राहणार आहे.
श्री.जगताप यांनी नमूद केले आहे की, आगामी काळातील ऊसतोड मजुरांची घटणारी संख्या पाहता आपला सोमेश्वर कारखाना सभासदांना ऊसतोड करण्यासाठी हार्वेस्टर खरेदीसाठी कारखान्यामार्फत बिनव्याजी कर्ज योजना राबविण्याचा विचार आहे. याबाबत इच्छुक सभासदांनी शेतकी विभागाशी संपर्क साधावा. पुढील हंगामात मार्चच्या पुढे तुटणाऱ्या ऊसाला अनुदान देण्याचा संचालक मंडळ विचार करीत असून सभासद बांधवांनी खोडवा पिक राखावे व याचा लाभ घ्यावा.
