दौंड : महान्युज लाईव्ह
दौंड तालुक्यातील रावणगाव बोरीबेल देऊळगाव राजे मार्गावर असलेल्या बोरीबेल येथील दळणवळण करण्यासाठी गैरसोय होत असलेल्या रेल्वे मार्गाचा अडथळा आता कायमचा सुटणार आहे. आमदार कुल यांच्या प्रयत्नातून रेल्वे भुयारी मार्ग (RUB) बांधण्यासाठी तब्बल १० कोटी रुपयांचा निधी राज्याच्या अर्थसंकल्पात मंजूर झाला आहे, ही माहिती दौंडचे आमदार राहुल कुल यांनी दिली.
रेल्वे लाईनमुळे बोरीबेल हे गाव दोन भागात विभागले गेले आहे, या एका भागातून दुसऱ्या भागात जाण्यासाठी पाणी जाण्यासाठी असलेल्या छोट्या मोरीतून नागरिकांना प्रवास करवा लागत होता. ही मोरी छोटी असल्याने त्यातून फक्त छोटी वाहन जात असल्याने त्या ठिकाणी मोठ्या भुयारी मार्गाची मागणी नागरिक मागील अनेक वर्षांपासून करीत होते.
आमदार राहुल कुल यांनी मुख्यमंत्री एकनाथ शिंदे, उपमुख्यमंत्री देवेंद्र फडणवीस, सार्वजनिक बांधकाम मंत्री रविंद्र चव्हाण यांच्याकडे पाठपुरवा करून निधी मंजूर करून घेतला आहे.
७ मीटर रुंद व ६ मीटर उंच असलेल्या या भुयारी मार्गामुळे नागरिकांचे दळणवळण सोपे होणार असून, मोठ्या वाहनांना रेल्वेमार्गाच्या दुसऱ्या भागात जाण्यासाठी पार करावे लागणारे लांबचे अंतर कमी होणार आहे, तसेच हा दळणवळणाचा प्रश्न कायमस्वरुपी मार्गी लागणार आहे.
दरम्यान, आमदार राहुल कुल यांनी पाठपुरावा करून हे काम मंजूर केल्याने मागील ५० वर्षांची मागणी पूर्ण विराम मिळाला आहे. त्यामुळे या भागातील नागरिकांनी समाधान व्यक्त केले आहे
