राजेंद्र झेंडे, महान्युज लाईव्ह
दौंड : बारामती तालुक्यातील सुपे येथे अज्ञात चोरट्यांनी तब्बल ७ लाख १४ हजार रुपये रक्कम असलेली एटीएम मशीनच चोरुन नेली. या चोरीसाठी वापरण्यात आलेली बोलेरो जीप ही या चोरांनी सासवड येथून चोरून नेल्याचे पोलीस तपासात समोर आले आहे.
ही जीप रावणगाव पोलिसांना पुणे सोलापूर राष्ट्रीय महामार्गावर खडकी हद्दीत सापडली आहे. ही माहिती दौंड पोलीस निरीक्षक भाऊसाहेब पाटील आणि वडगाव निंबाळकर पोलीस ठाण्याचे सहाय्यक पोलीस निरीक्षक सचिन काळे यांनी दिली.
शुक्रवारी (दि.१०) सुपे येथील इंडिकॅश कंपनीचे एटीएम मशीन गॅस कटरने तोडून चार चाकी वाहनातून चोरून अज्ञात चोरटे पुणे सोलापूर राष्ट्रीय महामार्गावरून रावणगाव – बोरीबेल रस्त्यावरील रावणगाव – बोरीबेल घाटात थांबले. चोरीचे एटीएम मशीन हे चोरटे गटारात लपवण्याचा प्रयत्न असताना ग्रामस्थांनी बघितल्याने ग्रामस्थांना बघताच त्या चोरट्यांनी मशीन तिथेच टाकून पसार झाल्याची घटना घडली होती.
या अज्ञात चोरट्यांनी या एटीएम मशीन चोरीसाठी वापरलेली बोलेरो जीप रावणगाव पोलिसांना शनिवारी (दि.११) सकाळी अकरा वाजण्याच्या आसपास पुणे सोलापूर राष्ट्रीय महामार्गावर खडकी हद्दीत सापडली. रावणगाव पोलीस चौकीचे पोलीस हवालदार गोरख मलगुंडे त्यांना माहिती मिळतात त्यांनी ही जीप ताब्यात घेतली.
दौंड पोलिसांनी या घटनेच्या तपासासाठी वडगाव निंबाळकर पोलीस ठाण्याच्या ताब्यात दिली आहे. दरम्यान याबाबत सहाय्यक पोलीस निरीक्षक सचिन काळे म्हणाले की, दौंड पोलिसांकडून या गुन्ह्यात वापरलेली बोलोरो जीप ताब्यात घेतली आहे, या चोरांनी सासवड येथून ही गाडी चोरुन नेली होती. याबाबत सासवड पोलीस ठाण्यात ही जीप चोरीला गेल्याचा गुन्हा दाखल आहे. या गुन्ह्याचा तपास सुरू असून एटीएम चोरीतील छडा लावून आरोपींना जेरबंद केले जाईल.
