भिगवण – महान्यूज लाईव्ह
खरंतर पहाटेची वेळ म्हणजे साखर झोपेची वेळ.. पण आज याच वातावरणात हजारो जण अगदी गटागटाने भिगवणच्या विद्या प्रतिष्ठान इंग्लिश मिडीयम स्कूलच्या नवीन इमारतीच्या प्रांगणात जमा होत गेले..आणि फ्लेमिंगो बनले.. अर्थात फ्लेमिंगोच्या नावाने आयोजित मॅरेथॉनचा एक भाग बनून गेले.
महिला दिनाचे औचित्य साधून विद्या प्रतिष्ठान इंग्लिश मिडीयम स्कूल बिल्ट – भिगवण या शाळेने अनेक स्पर्धांचे आयोजन केले होते. त्यापैकीच एक म्हणजे फ्लेमिंगो मॅरेथॉन स्पर्धा. रविवारी (ता. ५ मार्च) रोजी ही स्पर्धा झाली आणि शारीरिक तंदुरुस्तीचा संदेश या स्पर्धेमार्फत शाळेने नागरिकांना दिला.
भिगवणची खरी ओळख उजनी जलाशयातील फ्लेमिंगो पक्षी ही आहे आणि त्यामुळेच या मॅरेथॉनचे नाव ‘फ्लेमिंगो मॅरेथॉन’ ठेवण्यात आले. भिगवण आणि इंदापूरच्या परिसरात आयोजित करण्यात आलेली ही पहिलीच मॅरेथॉन स्पर्धा होती. ज्या स्पर्धेत १२०० जणांनी नोंदणी केली.
ही स्पर्धा एकूण तीन टप्प्यांमध्ये पार पडली. यापैकी पहिला टप्पा आठ किलोमीटर (महिला व पुरुष एकत्र), दुसरा टप्पा चार किमी (महिला व पुरुष गट) होता तर तिसरा टप्पा दोन किमी होता. ९ वर्षांखालील मुलांसाठी ‘फन रन’ हाही एक प्रकार होता.
बी.जी.बी.पी.एल.चे प्रमुख सी. नागेंद्र भट व सौ. वीणा भट, श्री. बाळासाहेब सोनवणे व सौ. सविता सोनावणे, विद्या प्रतिष्ठान संस्थेचे रजिस्ट्रार कर्नल श्री. श्रीष कंबोज यांनी हिरवा झेंडा दाखवून स्पर्धेची सुरुवात केली.
स्पर्धेचा विविध गटातील निकाल – ८ किमी – पुरुष व महिला एकत्र गट – १. प्रदीप भोई, २. चेतन राठोड, ४ किमी –
पुरुष गट – १. बालाजी अडवाल, २. स्वप्निल गलांडे
महिला गट – १. तनिष्का पाटील, २. रचना बांडे
भिगवण व दौंड पोलिस विभागाने मॅरेथॉन मार्गावर कडेकोट बंदोबस्त ठेवला होता. या स्पर्धेत भिगवण, दौंड, इंदापूर, करमाळा, अहमदनगर, कर्जत व बारामती या विविध भागातील स्पर्धकांनी आपला सहभाग नोंदवला.
या स्पर्धेच्या बक्षीस वितरणासाठी प्रमुख पाहुणे म्हणून नॅशनल ॲथलेटिक्स मनोज डोबांळे व तुषार निंबाळकर व भिगवण पोलिस स्टेशनचे सहायक निरीक्षक दिलीप पवार हे उपस्थित होते.
विद्या प्रतिष्ठान संस्थेच्या विश्वस्त सुनेत्रा पवार, सचिव ॲड. नीलिमा गुजर, उपाध्यक्ष ॲड. अशोकराव प्रभुणे, विश्वस्त डॉ. राजीव शहा, श्री. किरण गुजर, रजिस्ट्रार श्रीष कंबोज व डॉ. प्रेमेंद्र देवकाते यांनी या स्पर्धेसाठी मोलाचे मार्गदर्शन व सहकार्य लाभले. शाळेच्या मुख्याध्यापिका श्रीमती सरिता शिंदे व त्यांच्या सहकाऱ्यांचे अभिनंदन केले.
