आज पहाटे इंदापूर पोलिसांची बावडा भागात धडक कारवाई..चार दारूअड्डे केले उध्वस्त.. अडीच लाखांचा मुद्देमाल जप्त.. चार जणांवर गुन्हा दाखल करण्याची प्रक्रिया सुरू..!!
सुरेश मिसाळ : महान्यूज लाईव्ह
इंदापूर : काही दिवस झाले असतील, इंदापूर तालुक्यातील बावडा भागात पोलिसांनी धाडी टाकून अवैध दारूवाल्यांचे बॅरल जप्त केले होते. मात्र पोलीस थकतात की दारूवाले असाच जणू शिवणापावणीचा खेळ बावड्यात रंगला आहे, कारण एवढी मोठी धाड टाकल्यानंतरही व गुन्हे दाखल झाल्यानंतरही दारूवाल्यांना जणू काही फरकच पडला नाही, कारण पोलिसांची पाठ फिरली की, बॅरल बॅरल दारू निघायला सुरुवात झाली.
आज पहाटेच पाच वाजण्याच्या सुमारास पुन्हा इंदापूर पोलिसांनी बावडा हद्दीतील बेकायदेशीर हातभट्टी दारू अड्ड्यांवर धाड टाकून अडीच लाखांचा मुद्देमाल जप्त केला. दारूविक्री प्रकरणी चार जणांवर गुन्हा दाखल करण्याची प्रक्रिया सुरू असल्याची माहिती इंदापूर पोलिसांनी दिली.
इंदापूर पोलीस ठाण्याच्या बावडा दुरक्षेत्र हद्दीत अवैद्य बेकायदेशीर हातभट्टी दारु विक्री होत असल्याची माहिती इंदापूर पोलीस स्टेशनचे पोलीस निरीक्षक दिलीप पवार यांना मिळाली. सदर माहितीच्या अनुषंगाने पोलीस निरीक्षक दिलीप पवार यांनी सहाय्यक पोलीस निरीक्षक नागनाथ पाटील व इतर स्टाफ असे मिळून बावडाकडे पथक रवाना केले.
या पथकाने आज (दि.1) पहाटे पाच वाजता बावडा परिसरात वेगवेगळ्या ठिकाणी अवैध हातभट्टी दारू तयार करणाऱ्या 4 ठिकाणी छापा करून मानवी शरीरास अपायकारक अशा रसायनाने भरलेले तीनशे लिटरचे बॅरल 3 नग, दोनशे लिटरचे 12 नग, शंभर लिटरचा 1 नग व इतर साहित्य असा एकूण 2 लाख 49 हजार रुपयांचा मुद्देमाल जप्त केला.
या प्रकरणी भारतीय दंड संहिता व महाराष्ट्र दारूबंदी कायदा अन्वये 04 जणांविरुद्ध गुन्हे दाखल करण्याची प्रक्रिया इंदापूर पोलीस स्टेशन अंकित बावडा दूरक्षेत्र येथे सुरू आहे. आगामी होळी, ग्रामदैवत यात्रा, जयंती उत्सव व ग्रामपंचायत निवडणुकांच्या अनुषंगाने इंदापूर पोलीस यांच्याकडून अवैध धंद्यावरती धाडी टाकून धडक कारवाई केली जात आहे.
सदरची कारवाई पुणे ग्रामीणचे पोलीस अधीक्षक अंकित गोयल, अप्पर पोलीस अधीक्षक आनंद भोईटे, बारामती विभागाचे उपविभागीय पोलीस अधिकारी गणेश इंगळे यांच्या मार्गदर्शनाखाली इंदापूर पोलीस स्टेशनचे पोलीस निरीक्षक दिलीप पवार, सहाय्यक पोलीस निरीक्षक नागनाथ पाटील, सहाय्यक फौजदार के.बी.शिंदे, महिला पोलीस हवालदार खंडागळे, पोलीस नाईक अमोल गायकवाड, सुनील कदम, आप्पा हेगडे, लखन साळवी, पोलीस शिपाई विकास राखुंडे, विनोद काळे, समाधान केसकर यांनी केली.
