बारामती : महान्यूज लाईव्ह
मुख्यमंत्री एकनाथ शिंदे यांच्या वर्षा निवासस्थानावर खानपान सेवेसाठी एक जुलै ते 31 ऑक्टोबर 2022 या तीन महिन्याच्या कालावधीत, १२३ दिवसात २ कोटी ३८ लाख ३४ हजार ९५८ रुपयांचा खर्च झाला आहे.
ही एक प्रकारची उधळपट्टी असून दिवसाला सुमारे १ लाख ९३ हजार रुपयांचा खर्च मुख्यमंत्र्यांच्या वर्षा या शासकिय निवास्थानावर होत असल्याची माहिती बारामती तालुक्यातील माहिती अधिकार कार्यकर्ते नितीन यादव यांना माहिती अधिकारात प्राप्त झाली आहे.
नुकतेच शिंदे सरकारने ७ महिन्यात जाहिरातींसाठी ४२ कोटी रुपये शासकीय तिजोरीतुन खर्च केल्याची माहिती यादव यांना माहिती अधिकारात मिळाली होती, त्यानंतर आता मुख्यमंत्री एकनाथ शिंदे यांचे निवासस्थानचा होणाऱ्या वारेमाप खर्चाची माहिती काढली आहे. यामध्ये सोबतच सहयाद्री अतिथीगृहात चहा, कॅाफी, नाश्त्यासाठी ८ दिवसात ९१ हजार ५०० रुपयांचा खर्च केला आहे.
मुख्यमंत्री बैठक व त्यांच्या भेटीसाठी आलेल्या व्यक्तींसाठी चहा, कॅाफी, थंडपेयांसाठी ३ लाख ४९ हजार ९२९ रुपयांचा खर्च केल्याची माहिती या पत्रात देण्यात आली आहे. दरम्यान वारेमाप होणाऱ्या या उधळपट्टीवर अकुंश लावण्यासाठी शिंदे सरकारने प्रयत्न करावेत अशी विनंती नितीन यादव यांनी केली आहे.
