विक्रम वरे
बारामती : महान्यूज लाईव्ह
बारामती तालुक्यातील बांदलवाडी येथील रोहित दिलीप शिंदे या युवकाने जागतिक सूर्यनमस्कार दिनानिमित्त दुचाकीवर ४ मिनिटे २० सेकंदात १० सूर्यनमस्कार घालण्याचा विक्रम केला आहे. रोहित शिंदेने दुचाकीवर घातलेल्या सूर्यनमस्काराची इंडिया आणि एशिया बुक रेकॉर्डमध्ये नोंद झाली आहे. दुचाकीवर सूर्यनमस्कार काढणारा जगातील पहिला मोटारसायकल रायडर ठरला आहे.
रोहित शिंदे गेली बारा वर्ष मोटार सायकल रायडिंग करत असून आत्तापर्यंत ३०० हून अधिक मोटरसायकल रायडीग शो भारतात केले आहेत. मोटारसायकल रायडिंग करण्याचा हा छंद त्याने स्वतःपुरता मर्यादित न ठेवता अनेक युवकांना मोटर सायकल रायडिगचे प्रशिक्षण देण्यास सुरुवात केली आहे.
नुकत्याच झालेल्या झारखंडमधील रांची येथे मोठ्या सायकल रायडिंग मध्ये प्रथम क्रमांक मिळविला आहे. या स्पर्धेमध्ये देशातील ७० रायडरने भाग घेतला होता.३९० सीसी गाडीवर रेस जिंकून चेन्नई येथे होणाऱ्या ट्रॅक रेसिंग नॅशनल स्पर्धेसाठी रोहित शिंदेची निवड झाली आहे. यामध्ये प्रथम दहा मध्ये येणाऱ्या ऑस्ट्रिया केटीएम ग्लोबल हेडकॉटर स्पर्धेत भाग घेता येणार आहे.असे बजाज ऑटो लि.चे अध्यक्ष सुमित नारंग यांनी सांगितले आहे.
सन २०१८ मध्ये मोटारसायकल रायडिंगमध्ये रोहितचा महाराष्ट्रात पहिला व केरळमध्ये तिसरा क्रमांक आला होता. तर सन २०१९ मध्ये हैदराबादमध्ये प्रथम क्रमांक मिळविला होता. यापूर्वी तामिळनाडू कोईमतूरमध्ये झालेल्या मोटारसायकल रायडिंगमध्ये वेगवेगळ्या तीन स्पर्धेमध्ये रेकॉर्ड करून बारामतीतील रोहित शिंदे याने देशात पहिला क्रमांक मिळविला होता. सीआरएफ कंपनीने स्टंट वॉलफेअर राष्ट्रीय स्पर्धा आयोजित केली होती. यामध्ये फ्री स्टाईल स्टंट रायडिंग ऑबस्टूकल टाइम चॅलेंज व लास्ट मॅन स्टँडिंग या तिन्ही स्पर्धांमध्ये रोहित शिंदेने अव्वलस्थान पटकाविले होते. मोटारसायकल एका चाकावर उचलून जास्तीत जास्त गाडी गोल फिरविण्याची स्पर्धा होती.केवळ ८ मी. २८ सेकंद एवढ्या कालावधीत तिन्ही स्पर्धेत रेकॉर्ड केले होते.तिन्ही स्पर्धेत एकत्रित रेकॉर्ड करणारा रोहित शिंदे हा स्टंट रायडिंगमध्ये पहिला खेळाडू ठरला आहे. त्यामुळे रोहित शिंदे या युवकाचे सर्व स्तरातून अभिनंदन होत आहे.
