बारामती : महान्यूज लाईव्ह
आपल्या प्रापंचिक अडचणीसाठी दुसऱ्याचे घर फोडणे कितपत चांगले? पण पैशाची निकड आहे, म्हणून एका महिलेच्या फ्लॅटमध्ये शिरून तिच्या माणुसकीचा गैरफायदा घेत दागिने चोरून, त्यातून कर्ज काढणे एका महिलेच्या चांगलेच अंगलट आले.
बारामतीतील मळद रोड येथील देवळे अपार्टमेंट मध्ये असलेल्या ब्युटी पार्लर मधील महिलांच्या सुविधेसाठी केलेल्या सोयीचा गैरफायदा घेत ब्युटी पार्लरमध्ये येण्याचे निमित्त काढून चोरट्या महिलेने तब्बल 82 हजार रुपयांचे दागिने लांबवले.
याप्रकरणी तेजस्विता स्वप्निल जरांडे (वय 32 वर्ष व्यावसाय पार्लर राहणार मळद रोड देवळे पॅराडाईज फ्लॅट नंबर 8) यांनी बारामती शहर पोलिसांकडे फिर्याद दिली होती.
पोलिसांनी दिलेल्या माहितीनुसार जरांडे या त्यांच्या निवासस्थानी लेडीज पार्लर चालवतात. त्यांच्या घरात आजूबाजूच्या महिला पार्लरसाठी येत असतात, त्यामुळे त्यांच्या घरात साहजिकच महिलांचा वावर असतो. त्यांच्या घराच्या दोन चाव्या असतात. एक चावी कायम घराच्या खुंटीवर लटकवलेली असते, तर एक चावी त्या स्वतःजवळ ठेवतात.
दरम्यान त्यांची एक चावी अचानक गायब झाली आणि त्या 23 ते 28 जानेवारी दरम्यान त्या कामानिमित्त त्यांच्या मूळ गावी गेलेल्या होत्या. घरामध्ये कुणीही नव्हते. घरातील कपाटाची चावीही घरामध्येच होती आणि घरातील त्यांचे दागिने कपाटात होते. 28 जानेवारी रोजी त्या परत आल्या व त्यांनी घरात पाहिले असता त्यांच्या कपाटातील दागिने त्यांना मिळून आले नाही.
त्यांच्या लक्षात आले की, त्यांच्या घरातील दुसऱ्या चावीचा कोणीतरी वापर करून दरवाजा उघडून घरातील कपाटाच्या चावीचा वापर करून कपाटातील 14 ग्रॅम सोन्याचे गंठण, 5.6 ग्रॅम सोन्याची चैन, 2. 6 ग्रॅम वजनाचे कानातील टॉप्स, कपाटात ठेवलेले रोख 5 हजार घरातून चोरी केली. त्यामुळे त्यांनी बारामती शहर पोलीस ठाण्यास तक्रार दिली.
पोलिसांनी तात्काळ घरफोडीचा गुन्हा दाखल करून तपास सुरू केला . त्यांच्या घरात अनेक महिला येत असल्याने महिलांकडे कौशल्यपूर्ण तपास करणे तशी अवघड गोष्ट होती. अनेक महिलांना चौकशीसाठी बोलवावे लागले. यातून पोलिसांनी कौशल्याने तपास करत शेजारच्या परिसरातील एका महिलेकडे संशयाची सुई वळवली आणि तिच्याकडे चौकशी केल्यानंतर तिने या गुन्ह्याची कबुली दिली.
या महिलेला पैशाची अत्यंत आवश्यकता होती. त्यातून तिने जरांडे यांच्या घरातील महिलांसाठी असलेली सुविधा लक्षात घेऊन त्यांच्या घरातील चावी चोरली आणि त्यातून 82 हजार रुपयांचे दागिने लांबवले व ते दागिने पुण्यात एका ठिकाणी गहाणवट ठेवून त्यातून कर्ज काढले असे त्या तपासातून उघड झाले. दरम्यान संबंधित महिलेस अटक करून पोलिसांनी न्यायालयात हजर केले असता, न्यायालयाने या आरोपी महिलेस पोलीस कोठडी दिली. यानंतरच्या तपासात पुण्यात दिलेले दागिने पोलिसांनी हस्तगत केले असून, पुढील तपास बारामती पोलीस करत आहेत.
या गुन्ह्याचा तपास पोलीस अधीक्षक अंकित गोयल, अप्पर पोलीस अधीक्षक आनंद भोईटे, उपविभागीय पोलीस अधिकारी गणेश इंगळे यांच्या मार्गदर्शनाखाली बारामती शहर पोलीस ठाण्याचे प्रभारी सुनील महाडिक, सहाय्यक पोलीस निरीक्षक कुलदीप संकपाळ, प्रकाश वाघमारे,, पोलीस हवालदार कल्याण खांडेकर, पोलीस नाईक दशरथ कोळेकर, पोलीस हवालदार शिंदे, पोलीस शिपाई तुषार चव्हाण, दशरथ इंगवले, अक्षय शिताप, जामदार शाहू राणे व लोकरे यांनी केला.
