दौंड तालुक्यातील रावणगाव येथील धक्कादायक घटना! जागरूक पत्रकारामुळे घटना आली उघडकीस
दौंड : महान्यूज लाईव्ह
पुणे सोलापूर राष्ट्रीय महामार्गावर रावणगाव येथे एका तीन महिन्याच्या बाळाला महामार्ग व सेवा रस्त्याच्या मध्ये असलेल्या चारीत टाकून दिल्याची धक्कादायक घटना घडली आहे. याबाबत अज्ञात पालक व आई-वडिलांवर दौंड पोलीस ठाण्यात गुन्हा दाखल करण्यात आला आहे.
ही माहिती पोलीस निरीक्षक भाऊसाहेब पाटील यांनी दिली. पुणे सोलापूर राष्ट्रीय महामार्गावर रावणगाव हद्दीत ईश्वर रांधवण यांच्या शेताजवळ महामार्ग व महामार्गाच्या सेवा रस्त्याच्या मधील चारीत एका तीन महिन्याच्या बाळाला कडाक्याच्या थंडीत टाकून दिल्याची घटना शुक्रवारी ( दि.२७) निदर्शनास आली.
पुणे-सोलापुर राष्ट्रीय महामार्ग व सेवा रस्त्याच्या मध्ये चारीत एक लहान बाळ रडत असल्याचा आवाज आल्याने शेतकरी पद्माकर कांबळे, ईश्वर रांधवन अनिकेत रांधवन, युवराज रांधवन यांनी बाळाच्या रडण्याच्या आवाजाच्या दिशेने धाव घेतली.
यावेळी अंदाजे 3 महीन्याची मुलगी (बाळ) तिच्या अंगावर लाल रंगाचा श्वेटर व गुलाबी शालीत गुंडाळुन ठेवलेली व ती रडत असलेल्या अवस्थेत निदर्शनास आले. या शेतकऱ्यांनी या बाळाच्या नातेवाईकांचा आजुबाजुच्या परीसरामध्ये खूप वेळ शोध घेतला. मात्र ते मिळुन आले नाहीत. त्यामुळे शेतकऱ्यांनी हा प्रकार दौंड पोलीस ठाण्यात फोनवर कळवला.
याप्रकरणी दौंड पोलिसांनी कोणीतरी अज्ञात पालक आई वडीलांनी अंदाजे 3 महीने वयाच्या जिवंत मुलीस पालन पोषण व संगोपनाची जबाबदारी असताना तिला उघड्यावर सोडुन देऊन परीत्याग केल्याप्रकरणी गुन्हा दाखल केला आहे. शेतकरी पद्माकर कांबळे यांनी दौंड पोलीस ठाण्यात याबाबत फिर्याद दिली. दरम्यान,या बाळाच्या नातेवाईकांचा शोध दौंड पोलीस घेत आहेत.
