दौलतराव पिसाळ – महान्यूज लाईव्ह
वाई – वाई सार्वजनिक बांधकाम विभागाने पसरणी गावच्या यात्रेपूर्वी रस्ता दुरुस्त करावा अशी मागणी करणारे निवेदन पसरणीच्या ग्रामस्थांनी सार्वजनिक बांधकाम विभागाला दिले.
ग्रामस्थांच्या म्हणण्यानुसार वाई – पसरणी रस्त्याची दुरावस्था झाली आहे. पीडब्ल्यूडीने बऱ्याच वेळा खड्डे बुजविण्याचे काम केले, मात्र रस्त्यावरील वाहतूक नागरिकांसाठी जी गैरसोयीची बनली, ती आजही कायमच आहे. खराब रस्त्यामुळे वाहनांची तर दुरावस्था होतेच होते, शिवाय अपघाताचे, शारीरीक प्राकृतिक आजारांचे प्रमाणही वाढत आहे आणि त्याचीच खरी अधिक चिंता नागरिकांना आहे.
वाई तालुक्यातील पसरणीच्या ग्रामस्था्ंनी दिलेल्या निवेदनानुसार
मागील महिन्यात पसरणी वाई रस्त्याच्या कामाची स्थगिती राज्य शासनाने उठवली आहे. त्याची कामाची निविदा मंजूर होऊन कार्यारंभ आदेशही झाला असल्याची माहिती सार्वजनिक बांधकाम विभागाच्या सूत्रांनी दिली आहे. मात्र कशात घोडे अडलेय हेच गावकऱ्यांना समजत नाही.
अशा स्थितीत पुढच्या महिन्यात ११ फेब्रुवारी रोजी पसरणी गावची यात्रा आहे, त्या आधी हा रस्ता पूर्ण व्हावा, जेणेकरून राज्यभरातून येणाऱ्या भाविकांना आराध्य ग्रामदेवत असलेल्या श्री काळ भैरवनाथाच्या दर्शनासाठी फारशी यातायात सहन करावी लागणार नाही. दरम्यान हे निवेदन देतेवेळी आरपीआयचे युवानेते स्वप्नील गायकवाड, यादव महांगडे, अमोल महांगडे, काका मोझर व ग्रामस्थ उपस्थित होते.