प्रदीप जगदाळे, बारामती; राजेंद्र झेंडे, दौंड
महावितरणच्या अधिकारात बाधा आणून अदानी कंपनीला समान वीज वितरणाचा परवाना देण्याच्या निषेधार्थ महावितरणचे कर्मचारी पुढील तीन दिवस संपावर असणार आहेत. दरम्यान या काळात वीज पुरवठा खंडित होऊन ग्राहकांना गैरसोय होऊ नये यासाठी महावितरणने सनियंत्रण कक्ष स्थापन केला आहे या तीन दिवसात कोठेही आपत्कालीन व्यवस्था अडचणीत येणार नाही याची काळजी महावितरण घेणार आहे.
महावितरणचे सर्व अधिकारी आणि कर्मचारी तीन जानेवारीच्या मध्यरात्रीपासून संपावर जाणार आहेत, तर पुढे तीन दिवस हा संप आसाच सुरू राहणार आहे. खासगीकरणाच्या विरोधात हा संप असेल. महावितरणचे खासगीकरण केले जाणार असून अदानी कंपनीने समान वीज वितरणाच्या परवानगीची मागणी केली आहे. यासाठी सरकार सकारात्मक आहे. तो परवाना कोणत्याही परिस्थितीत देऊ नये ही या संपाची प्रमुख मागणी आहे. या मागणीसाठी हे आंदोलन केले जाणार आहे या संपात 30 संघटना सहभागी होणार आहेत.
दरम्यान दुसरीकडे संप काळातही अखंडित वीज पुरवठ्यासाठी महावितरण सज्ज राहणार असल्याचे महावितरणच्या वरिष्ठ कार्यालयाने स्पष्ट केले आहे. महावितरण कंपनीच्या भांडुप परिमंडलातील कार्यक्षेत्रामध्ये अदानी इलेक्ट्रीकल्स कंपनीने वीज वितरणासाठी विद्युत नियामक आयोगाकडे मागितलेल्या परवान्याच्या विरोधात राज्याच्या वीज कामगार संघटनांनी आज मध्यरात्रीपासून तीन दिवसांच्या पुकारलेल्या संपकाळात राज्यातील ग्राहकांना अखंडित वीजपुरवठा मिळावा यासाठी महावितरणने संपूर्ण तयारी केली आहे.
वीजपुरवठ्याच्या परिस्थितीवर लक्ष ठेवण्यासाठी मुंबई येथील मुख्य कार्यालयासह सर्व परिमंडल व मंडल कार्यालयाच्या ठिकाणी संनियंत्रण कक्ष सुरू करण्यात आली असून हे नियंत्रण कक्ष २४ तास कार्यरत राहणार आहे. कंपनीने ठरवून दिलेली कामे न करणाऱ्या अधिकारी व कर्मचा-यांच्या विरोधात कडक कारवाई करण्यात येणार आहे.
रजेवर असलेल्या अधिकारी व कर्मचाऱ्यांना त्वरीत कामावर रूजू होण्याचे आदेश देण्यात आले आहे. संपकाळात वीजपुरवठा अखंडित व नियमित ठेवण्याकरिता महावितरणने नियुक्त केलेल्या एजन्सीचे कामगार, कंत्राटी कामगार, सेवानिवृत्त झालेले अभियंता व कर्मचारी यासोबतच सार्वजनिक बांधकाम विभाग, विद्युत निरीक्षक व महाऊर्जा या विभागातील अभियंत्यांना या संपकाळात विविध उपकेंद्राच्या ठिकाणी नेमण्यात येणार आहे.
महावितरणतर्फे नियुक्त करण्यात आलेल्या ज्या एजन्सी या संपकाळात काम करणार नाहीत, अशा एजन्सींना तात्काळ बडतर्फ करण्याचे निर्देश देण्यात आले असून, वीजपुरवठा सुरळित ठेवण्यासाठी ज्याठिकाणी साहित्याची आवश्यकता भासणार आहे. अशा ठिकाणी आजच साहित्याची व्यवस्था करण्याचे निर्देशही सर्व क्षेत्रीय अधिकाऱ्यांना देण्यात आले आहेत.
महावितरण, महानिर्मिती व महापारेषण या शासकीय वीज कंपन्यांमध्ये कार्यरत असलेल्या अभियंता, तंत्रज्ञ, कर्मचारी, कंत्राटी कर्मचाऱ्यांनी मंगळवारी ४ जानेवारीच्या शून्य तासांपासून ६ जानेवारीपर्यत संपावर जाण्याचा इशारा दिला आहे.
या काळात ग्राहकांना अखंडित वीजपुरवठा मिळावा यासाठी महावितरण संपूर्ण काळजी घेत असून, याउपरही वीजपुरवठा खंडित झाल्यास ग्राहकांनी टोल फ्री क्र. 1800-212-3435/1800-233-3435/1912/19120 यावर संपर्क साधावा.
दुसरीकडे संपात सहभागी असलेल्या सर्व संघटनांच्या पदाधिकाऱ्यांसोबत राज्याचे उपमुख्यमंत्री व ऊर्जामंत्री देवेंद्र फडणवीस यांच्या उपस्थितीत ४ जानेवारी रोजी दुपारी १.०० वा. सह्याद्री अतिथीगृहात बैठकीचे आयोजन करण्यात आले आहे. सर्व संघटनांच्या पदाधिकाऱ्यांनी आपला प्रस्तावित संप मागे घ्यावा, असे आवाहन करण्यात आले आहे.
