बारामती : महान्यूज लाईव्ह
सध्या संपूर्ण महाराष्ट्रात जिच्या कार्यक्रमापेक्षा त्या कार्यक्रमात होणाऱ्या गोंधळाची बातमी होते आणि त्यातून तिची चर्चा जास्त होते, त्या सबसे कातील.. गौतमी पाटील च्या संपूर्ण कार्यक्रमास महाराष्ट्रभर बंदी घालण्यात यावी अशी मागणी यशवंत ब्रिगेड संघटनेने केली आहे.
यशवंत ब्रिगेडचे अध्यक्ष बापूराव सोलनकर यांनी मुख्यमंत्री उपमुख्यमंत्री, सांस्कृतिक मंत्री यांच्याकडे निवेदनाद्वारे मागणी केली आहे. गौतमी पाटील हिच्या अश्लील नृत्यामुळे तरुणाईमध्ये चुकीचा संदेश जात असून गौतम पाटील हिने प्रसिद्धीसाठी अश्लील हावभाव करून युवा वर्गाला भुरळ घातली आहे.
महाराष्ट्राला एक सांस्कृतिक परंपरा आहे. गौतमी पाटील च्या कार्यक्रमांत नृत्य कमी आणि अश्लीलता जास्त असल्याने महाराष्ट्रभर तिच्या कार्यक्रमावर कायमची बंदी घालण्यात यावी. महाराष्ट्रातील लावणी परंपरेला व संस्कृतीला छेद देत सार्वजनिक ठिकाणी अश्लील नृत्य सादर करणाऱ्या गौतमी पाटील हिच्यावर बंदी घालण्याची मागणी केली आहे.
तिच्या हावभावाचे व्हिडिओ मोबाईल मुळे घराघरात पोहोचत असून, त्याचा विपरीत परिणाम होऊ लागला आहे. गौतमी पाटील सार्वजनिक ठिकाणी नृत्यांचा नावाखाली अश्लील वर्तन करते. त्यामुळे कार्यक्रमात गोंधळ निर्माण होतो. कायदा सुवेवस्थेचा प्रश्न निर्माण होतो. त्यामुळे तिच्या कार्यक्रमावर कायमची बंदी घालण्यात यावी अशी मागणी करण्यात आली आहे. या निवेदनावर देवेंद्र बनकर, पुरुषोत्तम ढोणे, धनंजय पडळकर, प्रा कैलास महानोर, ऋषिकेश नरुटे इत्यादींच्या सह्या आहेत.
