बारामती – महान्यूज लाईव्ह
बारामती तालुक्यातील १३ ग्रामपंचायतीच्या निवडणूकांचा निकाल आज सकाळपासून जाहीर होण्यास सुरवात झाली आणि अनपेक्षित निकालानंतरच्या आवाजाने बारामतीच्या प्रशासकीय इमारतीसमोरील आवार दणाणून गेले.. पणदरे, कुरणेवाडी या गावांमधील धक्कादायक निकालाने आम्हाला गावपातळीवर गृहीत धरून चालत जाऊ नका असाच गावकऱ्यांनी प्रस्थापितांना संदेश दिला.
पणदरे गावात अत्यंत चुरशीची निवडणूक झाली. माळेगावचे माजी उपाध्यक्ष तानाजी कोकरे यांच्या पॅनेलने सरपंचपदाची बाजी मारली, मात्र सत्यजित जगताप व विक्रम कोकरे यांच्यासह त्यांच्या सहकाऱ्यांनी उभ्या केलेल्या पॅनेलला गावकऱ्यांनी चांगलीच दाद दिली. या पॅनेलमधील ८ उमेदवार विजयी झाले. तर तानाजी कोकरे व त्यांच्या सहकाऱ्यांच्या नेतृत्वाखालील पॅनेलने ७ जागा व सरपंचपदाची जागा अजित सोनवणे यांनी जिंकली.
सर्वांचे लक्ष लागून राहीलेल्या कुरणेवाडी गावात बारामती दूध संघाचे अध्यक्ष संदीप जगताप यांना मोठा धक्का बसला. कुरणेवाडी गावात ६ विरूध्द २ जागांनी विरोधकांनी संदिप जगताप यांना धक्का दिला. सरपंचपदी येथे आशा किसन काळभोर या निवडून आल्या.
पळशी ग्रामपंचायतीत जिल्हा परीषदेचे माजी सभापती भाऊसाहेब करे व त्यांच्या सहकाऱ्यांच्या नेतृत्वाखालील पॅनेलने बाजी मारली. सरपंचपदाच्या जागेसह १० पैकी १० जागा जिंकून एकतर्फी वर्चस्व प्रस्थापित केले. वाघळवाडी ग्रामपंचायतीत हेमंत गायकवाड हे सरपंचपदी निवडून आले. तर वाणेवाडी गावात गितांजली जगताप या सरपंचपदी निवडून आल्या.
