राजेंद्र झेंडे
दौंड: महान्युज लाईव्ह
पुणे महानगरपालिकेची पीएमपीएमएलची बंद करण्यात आलेली बससेवा जिल्ह्यातील ग्रामीण भागात मागील काही दिवसांपासून पुन्हा सुरू करण्यात आली आहे. मात्र ही बससेवा दौंड तालुक्यातील पाटसला सुरू झालेली नाही. त्यामुळे ज्येष्ठ नागरिक, विद्यार्थी शेतकरी यांनी तीव्र नाराजी व्यक्त केली आहे. तर ही बससेवा सुरु न झाल्यास रास्ता रोको करण्याचा इशारा ग्रामविकास फाउंडेशन च्या पदाधिकाऱ्यांनी दिला आहे.
पुणे महानगरपालिकेने मागील अनेक वर्षांपासून ग्रामीण भागात पीएमपीएमएलची बससेवा सुरु ठेवली होती. या बससेवेची मागणी दौंड तालुक्यात वाढत असल्याने तालुक्यातील राहू, यवत, चौफुला व वरवंड या गावांमध्ये बस सुरू करण्यात आली. पाटस ग्रामस्थांच्या वतीने पाटस येथे ही हडपसर ते पाटस ही बस सेवा सुरू करण्याबाबत पत्रव्यवहार केल्याने २४ फेब्रुवारी २०२२ रोजी हडपसर ते कुरकुंभ अशी बससेवा सुरू करण्यात आली होती. दौंडचे माजी आमदार रमेश थोरात यांच्या हस्ते शुभारंभ करत मोठ्या थाटामाटात ही बस सेवा सुरू करण्यात आली होती. मात्र महिनाभरच ही बससेवा सुरू राहिली आणि नंतर बंद पडली. मागील काही दिवसांपूर्वी पुणे महानगरपालिकेने ग्रामीण भागातील ही बससेवा बंद करण्याचा निर्णय घेतला आणि दौंड तालुक्यात सुरू असलेली ही बससेवा बंद झाली.
याबाबत बारामती विभागाच्या खासदार सुप्रिया सुळे , राष्ट्रवादी काँग्रेसच्या महिला अध्यक्ष वैशाली नागवडे यांनी ग्रामीण भागातील ही बससेवा सुरू करण्यासाठी पत्रव्यवहार करत आंदोलनाचा इशारा दिला होता. त्यामुळे ग्रामीण भागातील बससेवा पुन्हा सुरू करण्याचा निर्णय महानगरपालिकेने घेतला. मागील काही दिवसांपासून तालुक्यातील राहू,यवत व वरवंड या गावांमध्ये बंद झालेली ही बस पुन्हा धावू लागली. तर तालुक्यातील पारगाव (सा.मा.) या ठिकाणी ही हडपसर ते पारगाव ही बस नुकतीच चालू करण्यात आली आहे. मात्र हडपसर ते पाटस ही बस सेवा सुरू करण्यास महानगरपालिकेच्या व्यवस्थापकांनी नकार दिला आहे. खासदार सुप्रिया सुळे यांनी दिलेल्या पत्रावर हडपसर ते पाटस ही बस सेवा सुरू करण्याची मागणी केली होती, मात्र तरीही पुणे महानगरपालिकेच्या संबंधित अधिकाऱ्यांनी व व्यवस्थापकांनी हडपसर ते पाटस ही बस सेवा सुरू करण्यास नकार दिल्याने ज्येष्ठ नागरिक विद्यार्थी शेतकरी, कामगार, प्रवासी तीव्र नाराजी व्यक्त करीत आहे. मात्र हडपसर ते कुरकुंभ अशी बससेवा सुरू होतीच. हीच बस हडपसर ते पाटसपर्यंत सुरू करावी अशी मागणी पाटस परिसरातील ग्रामस्थ, ज्येष्ठ नागरिक शेतकरी विद्यार्थी सातत्याने करीत आहेत.
पाटस,बिरोबावाडी, हिंगणीगाडा, वासुंदे , रोटी,कुसेगाव,कानगाव बेटवाडी,गार गावातील शेतकरी, ज्येष्ठ नागरिक, विद्यार्थी व नोकरदार आदींची पुण्याला नियमित ये जा असते. सुरू असलेली ही बससेवा अचानकपणे बंद झाल्याने सध्या महिला, ज्येष्ठ नागरिक, शेतकरी विद्यार्थी व नोकरदार वर्ग यांची मोठी गैरसोय होत असुन अनेक अडचणींना सामोरे जावे लागत आहे, त्यांना राज्य परिवहन विभागाच्या एसटी बसची वाट बघत ताटकळत तासनतास बसावे लागत आहे, ही एक प्रकारे प्रवाशांची ससेहोलपट आहे. हडपसर ते पाटस बससेवा पुन्हा सुरु झाल्यास या सर्वांची गैरसोय थांबणार आहे. त्यामुळे पुणे महानगरपालिकेच्या संबंधित अधिकारी यांनी ही बस त्वरित सुरू करण्याची मागणी होत आहे. याबाबत पाटस ग्रामविकास फाउंडेशनच्या पदाधिकाऱ्यांनी पीएमपीएमएलचे अध्यक्ष,व्यवस्थापकीय संचालक संचालक ओमप्रकाश बकोरिया यांच्याकडे सातत्याने पत्र व्यवहार केला आहे. मात्र हडपसर ते पाटस ही बस सेवा सुरू करण्यासंदर्भात ठोस निर्णय घेतला जात नाही.
याबाबत पुणे पीएमपीएमएल चे वाहतूक व्यवस्थापक दत्तात्रय झेंडे यांना विचारले ते म्हणाले की, पुणे महानगरपालिकेच्या हद्दीतील ग्रामीण भागातीलच बस सेवा फक्त सुरू करण्यात आल्या आहेत. हडपसर ते पाटस ही बस सेवा सुरू करण्याबाबत अद्याप विचार केला नसुन सध्या तरी ही बससेवा सुरू करता येणार नाही.
दरम्यान, याबाबत पाटस ग्रामविकास फाउंडेशनचे अध्यक्ष हर्षद बंदिष्टी म्हणाले की, हडपसर ते पाटस ही बस सेवा सुरू करण्यासंदर्भात पीएमपीएमएलचे अध्यक्ष ओमप्रकाश बकोरिया यांची भेट घेऊन त्यांना पत्र्यावरही केला आहे. आमदार राहुल कुल, माजी आमदार रमेश थोरात, खासदार सुप्रिया सुळे व संबंधित विभागांच्या अधिकाऱ्यांना सातत्याने पत्रव्यवहार केला आहे. तरीही हडपसर ते पाटस ही बससेवा सुरू होत नसेल तर विद्यार्थी, शेतकरी, जेष्ठ नागरिक व ग्रामस्थांच्या वतीने पुणे- सोलापूर महामार्गावर लवकरच रास्ता रोको आंदोलन करु, असा इशारा बंदिष्टी यांनी पीएमपीएमएल च्या व्यवस्थापकांना दिला आहे.
