बारामती : महान्यूज लाईव्ह
दौंड तालुक्यातील खुटबाव येथील साळोबाचीवस्ती येथे 23 ऑगस्ट 2015 रोजी घटना घडली होती. रात्रीच्या वेळी शोभा इंगळे हिने तिचा पती अनिल संतोष इंगळे यांच्या डोक्यात आधी दगड घातला व नंतर विळ्याने वार करून त्याचा खून केला.
केवळ दोघांमध्ये पटत नसल्याच्या कारणावरून हा खून झाल्याने परिसरात खळबळ उडाली होती. या खटल्याची सुनावणी बारामतीतील जिल्हा व सत्र न्यायाधीश जे.ए. शेख यांच्यासमोर झाली. यामध्ये न्यायाधीश श्री शेख यांनी शोभा अनिल इंगळे हिच्यावर खुनाचा आरोप निश्चित करून जन्मठेपेची व पाच हजार रुपये दंड आणि दंड न भरल्यास पंधरा दिवसांची साध्या कारावासाची शिक्षा ठोठावली.
ही घटना 23 ऑगस्ट 2015 रोजी घडली होती. मयत अनिल संतोष इंगळे यांचा भाऊ सुनील संतोष इंगळे यांनी शोभा अनिल इंगळे हिच्याविरोधात तक्रार दिली होती. त्यावरून पोलिसांनी खुनाचा गुन्हा दाखल करून तत्कालीन तपास अधिकारी आर. के. गवळी यांनी शोभा इंगळे हिस अटक केली होती.
या खटल्याची सुनावणी न्यायाधीश श्री. शेख यांच्यासमोर चालली. यामध्ये सरकारी पक्षाच्या वतीने सरकारी वकील एडवोकेट सुनील वसेकर यांनी कामकाज पाहिले. यामध्ये एकूण दहा साक्षीदार तपासण्यात आले. सरकारी वकिलांचा युक्तिवाद व साक्षीदारांचे जबाब आणि प्रत्यक्षदर्शी पुरावा ग्राह्य धरून न्यायालयाने खुनाच्या गुन्ह्यात आरोपी शोभा इंगळे हीस वरील प्रमाणे शिक्षा ठोठावली.
या खटल्यात यवत पोलीस ठाण्याचे तत्कालीन पोलीस निरीक्षक नारायण पवार यांचा मार्गदर्शनाखाली पोलीस अधिकारी श्री. मदने यांनी खटल्याचे अधिकारी म्हणून कामकाज पाहिले. त्यांना पोलीस नाईक वेणूनाद ढोपरे यांनी सहकार्य केले, तर बारामतीच्या न्यायालयात पैरवी अधिकारी म्हणून सहायक फौजदार नामदेव नलावडे यांनी सरकारी पक्षास सहकार्य केले.
