आज संदल, शुक्रवारी मुख्य उरूस, तर शनिवारी पार पडणार झेंड्याचा कार्यक्रम..!
सुरेश मिसाळ : महान्यूज लाईव्ह
इंदापूर : इंदापूरचे वैभव, सर्वधर्मीयांचे श्रद्धास्थान, तसेच इंदापूरच्या धार्मिक व सांस्कृतिक इतिहासाचे सुवर्णपान असलेल्या ऐतिहासिक हजरत चाँदशाहवली दर्ग्याच्या ४५८ व्या उरूसाला आजपासून (१ डिसेंबर, मार्गशीर्ष ८) सुरुवात झाली.
आज संदलचा कार्यक्रम पार पडणार असून शुक्रवारी (२ डिसेंबर) मुख्य उरूस, तर शनिवारी (३ डिसेंबर) झेंड्याचा (ग्राम प्रदक्षिणा) कार्यक्रम पार पडणार आहे.कोरोनाच्या पार्श्वभूमीवर मागील दोन वर्ष उरूस पारंपरिक मात्र अत्यंत साध्या पद्धतीने साजरा करण्यात आला होता.
यावर्षी मात्र कोरोनाचे सावट हटल्याने उरूसाचा उत्सव शासनाच्या निर्बंधाशिवाय साजरा होणार आहे. त्यामुळे भाविकांनी दर्शनाचा लाभ घ्यावा असे आवाहन दर्ग्याचे विश्वस्त मुनीर मुजावर, तसेच उरूस कमिटीचे अध्यक्ष आझाद पठाण, उपाध्यक्ष महादेव चव्हाण आणि प्रमुख मानकरी हमीद आत्तार यांच्याकडून करण्यात आले आहे.
सध्या दर्गा परिसरात छोट्या मोठ्या वस्तूंची आणि मिठाईची हजारो दुकाने थाटली आहेत. तर दर्ग्याला विद्युत रोषणाईसह परिसराची रंगरंगोटी आणि स्वच्छ्ता करण्यात आल्याने संपूर्ण दर्गा परिसर उजळून निघाला आहे.
मालोजी राजेंच्या श्रद्धास्थानी असलेल्या या दर्ग्याला हिंदू मुस्लिम ऐक्याचे वलय आहे. त्यामुळे महाराष्ट्राच्या कानाकोपऱ्यातून विविध जाती धर्माचे हजारो भाविक उरुसाच्या वेळी दर्ग्याच्या दर्शनाला येतात. उरुसातील बऱ्याच विधींचा मान विविध जाती धर्मातील बांधवांना असून, अरबी, इंग्रजी नव्हे तर हिंदू कालगणनेतील मार्गशीर्ष महिन्याच्या ८-१० तारखेलाच हा उरूस साजरा केला जातो.
