घनश्याम केळकर
महान्यूज लाईव्ह विशेष
वाचकाने आपली बातमी वाचली पाहिजे असे कुठल्याही प्रसार माध्यमांना वाटणे साहजिक आहे, परंतू त्यासाठी किती उथळपणा करायची याची काही मर्यादा असते. मात्र सध्या माध्यमांनी सगळ्याच मर्यादा सोडलेल्या आहेत.
बिहारमधील आरा शहरात एक व्यक्तीने आपल्या काकावर हल्ला करून त्याची निर्घृण हत्या केली. खरेतर अशा घटना दररोज कुठे ना कुठे घडत असतात. माध्यमे त्याकडे ढुंकूनही पहात नाही. पण ही बातमी मात्र प्रतिष्ठित माध्यमांनी ठळकपणे चालवली. याचे कारण म्हणजे त्या व्यक्तीचे नाव बॉबी देओल होते.
सध्या बातम्या हेडींग किती भडक यावर चालतात. त्यामुळे या बातमीच्या हेडींगमध्ये ‘ बॉबी देओलने सख्ख्या काकाला संपवले ‘ असे उल्लेख केला. पण हे बॉबी देओल नेमका कोण हे मात्र अस्पष्ट ठेवले. हजारो वाचकांना हा माणुस म्हणजे अभिनेता बॉबी देओल, म्हणजेच सनी देओलचा भाऊ आणि धमेंद्रचा मुलगा वाटला. त्यामुळे त्यांनी ही बातमी वाचली. बातमी वाचल्यावर त्यांच्या खरे काय ते लक्षात आले.
खरे पाहता ही वाचकाची शुद्ध फसवणूक आहे. पण लोकशाहीच्या या चौथ्या स्तंभाला कोण काय बोलणार. सगळ्या दुनियेला अक्कल शिकविण्याचा मक्ता ज्यांच्याकडे आहे, त्यांना कोण अक्कल शिकवणार?
