खून केला, महिने झाले आठ…कितीही मातब्बर असला, तरी पोलिसांशी पडतेच गाठ..! वडगाव निंबाळकरच्या अनैतिक संबंधातल्या खुनाचा कट आठ महिन्यांनंतर कसा उलगडला? गावाकडचा आरोपीही थंड डोक्याने कसे खून करतो.. पहा!

बारामती – महान्यूज लाईव्ह

वडगाव निंबाळकर येथील वैभव विठ्ठल यादव याच्या फेब्रुवारी २०२२ मध्ये झालेल्या खूनाचा उलगडा अखेर वडगाव निंबाळकर पोलिसांनी लावलाच, मात्र हा खून म्हणजे अगदी सहजगत्या, परंतू थंड डोक्याने कसा केला होता याचा किस्सा उघड झाल्यानंतर गावपातळीवरही गॅंगवार कसे रुजले आहे याची प्रचिती आल्याशिवाय राहत नाही.

१९ फेब्रुवारी २०२२ रोजी वैभव यादव याला त्याची पत्नी वृषाली व गावातील रोहित दत्तात्रेय खोमणे या दोघांमधील अनैतिक संबंधांवर संशय आल्याने त्याने पत्नीला मारहाण केली व रोहित यास शिवीगाळ केली. त्याचा राग मनात धरून रोहित याने वृषाली हिच्यासह सागर सर्जेराव यादव, शिवदत्त उर्फ दादा श्रीधर सूर्यवंशी यांच्या मदतीने वैभव यादव याचा काटा काढला.

वडगाव निंबाळकर येथील राहत्या घरातून वैभवला घेऊन रोहित खोमणे हा चारचाकी वॅगनआर गाडीतून कोऱ्हाळे खुर्द येथील रवींद्र जाधव यांच्या शेतात घेऊन गेला आणि वैभवच्या पत्नीसह सर्वांनी बांबू आणि उसाच्या दांडक्याने वैभवला जीवे मारले.

यानंतर वैभव याचे प्रेत सातारा जिल्ह्यातील फलटण तालुक्यातील पाडेगाव येथे तरटीचा माळ येथील निरा उजव्या कालव्यात फेकून दिले. त्यानंतर वैभव याच्या बेपत्ता होण्याची नोंद वडगाव निंबाळकर पोलिसांकडे झाली होती.

पोलिसांना सुरवातीपासून संशय असला तरी रोहित खोमणे व वृषाली यादवच नाही, तर वृषालीची सासू म्हणजे वैभव याची आईदेखील रोहित खोमणे याच्यावर संशय घेण्यास तयार नव्हती. त्यामुळे पोलिसांना वेगळ्या मार्गाने जाऊन या तपासावर लक्ष केंद्रीत करावे लागले.

मग वृषाली वापरत असलेल्या मोबाईलचे कॉल डिटेल्स काढण्यात आले. मात्र त्यातूनही लागलीच पोलिसांच्या हातात काही आले नाही. मात्र वडगाव निंबाळकर पोलिस हताश झाले नाहीत. त्यांनी तपासातील सातत्य सुरूच ठेवले. या दरम्यानच्या कालावधीत संशयितांचे गावातील येणे-जाणे काहीसे कमी झाले होते, त्याचाही संशय पोलिसांना होता.

मग तपास सातारा जिल्ह्यात असल्याने कागदोपत्री तांत्रिक बाबी शोधताना पोलिसांचा कस लागला. मात्र जेव्हा पोलिसांच्या हे लक्षात आले की, रोहित यानेच त्याचा फोन वृषाली हिस वापरण्यासाठी दिला होता, तेव्हा पोलिसांनी पुन्हा तांत्रिक बाबींवर काम केले आणि हळूहळू आरोपी पोलिसांच्या नजरेत आले.

अखेरच्या टप्प्यात पोलिसांनी फत्ते केली आणि आपल्या बापाच्या खूनाचा उलगडा वैभव याच्या चिमुकल्यानेही केला. कारण खून होतेवेळी वैभवच्या मुलाला घेऊन वृषाली ही खूनाच्या ठिकाणी होती. या मुलाने त्यावेळी घाबरून काहीच सांगितले नाही, मात्र जेव्हा आता हा प्रकार समोर आला, तेव्हा मुलानेही सारा घटनाक्रम सांगितला आणि वडगाव निंबाळकर पोलिस ठाण्याचे सहायक निरीक्षक सोमनाथ लांडे, फौजदार योगेश शेलार, हवालदार महेंद्र फणसे व त्यांच्या सहकाऱ्यांनी आरोपींविरोधातील फास आणखी आवळला..