दौंड : महान्युज लाईव्ह
दौंड तालुक्यातील रावणगाव येथील जागृत देवस्थान म्हणून प्रसिद्ध असलेल्या शिवची आई मंदिरातील गाभारा अज्ञात व्यक्तींनी जाळला. यामध्ये देवीची मूर्तीही जळाली असल्याचा धक्कादायक घटना घडली आहे. पुणे सोलापूर राष्ट्रीय महामार्गालगत असलेल्या रावणगाव – मळद गाव च्या शिवेवर ही घटना घडली.
रावणगावच्या हद्दीत असलेल्या शिवची देवीच्या मंदिरात सोमवार (दि.१०) रात्रीच्या सुमारास अज्ञात व्यक्तीने मंदिरात प्रवेश करुन देवीच्या मूर्तीच्या गाभारा पेटविला. या आगीत मंदिरातील देवीच्या मूर्तीलाही आगीच्या झळा लागल्या.
मंगळवारी सकाळी काही भक्त देवीची पूजाअर्चा करण्यासाठी मंदिरात गेले असता हा प्रकार उघडकीस आला. कोणीतरी समाजकंटकांनी जाणुनबुजून हे कृत्य केले असण्याची शक्यता भाविक व ग्रामस्थांकडुन वर्तवली जात आहे. या समाजकंटकांनी मंदिरातील देवीचे खण,साडी तसेच छबिन्याचे साहित्य खाली फेकून तेलाचा डबा गाभाऱ्यात ओतून पेटविल्याने सर्व गाभारा जळून खाक झाला.
त्यामध्ये देवीची मूर्ती पूर्णपणे जळून तडकल्याने मोठ्या प्रमाणावर नुकसान झाले आहे. या घटनेनंतर परिसरातील ग्रामस्थांनी मंदिर परिसरात धाव घेत तीव्र संताप व्यक्त केला असून, या घटनेचा तीव्र निषेध केला आहे. हे कृत्य करणाऱ्या अज्ञात समाजकंटकांचा शोध घेऊन कठोर कायदेशीर कारवाई करावी, अशी मागणी परिसरातील भाविक व ग्रामस्थांनी केली आहे.दरम्यान, या घटनेबाबत दौंड पोलीस ठाण्यात अद्याप गुन्हा दाखल करण्यात आला नाही.
