शिरूर – महान्यूज लाईव्ह
मराठी बिग बॉस चे नवे पर्व लवकरच सुरू होत असून अभिनेते किरण माने हे मराठी बिग शो मध्ये सहभागी होणार असल्याची घोषणा स्वतः किरण माने यांनी केली आहे. मराठी बिग बॉस लवकरच सुरू होत असून मागील पर्वात सोनाली पाटील,जय दुधाने,सुरेखा कुडची,तृप्ती देसाई आदीनी चांगलीच धमाल उडवून दिली होती.
बिग बॉस च्या घरात १०० दिवस राहणारा विजेता ठरत असतो.यात स्पर्धकाला अनेक आव्हानांना सामोरे जावे लागत असते.प्रसिद्ध दिग्दर्शक महेश मांजरेकर या शो चे होस्ट असणार असून या पर्वात कोण कोण स्पर्धक सहभागी होणार याबाबत सर्वांना मोठी उत्सुकता लागून राहिली आहे.
अभिनेते किरण माने हे सोशल मीडियावर मोठ्या प्रमाणावर नेहमीच सक्रिय असतात.तसेच त्यांनी यापूर्वी अनेक व्याख्यानातून तुकोबा उलगडले आहेत.त्यामुळे त्यांनीच स्वतः बिग बॉस मध्ये सहभागी होत असल्याची माहिती पोस्टद्वारे चाहत्यांना दिली आहे.
बिग बॉस च्या अद्भुत घराचे नुकतेच फोटो सोशल मीडियावर प्रसिद्ध झाले असून या घरात १०० दिवस कोण राहणार हे पाहणे अधिक रंजक ठरेल.अभिनेते किरण माने बिग बॉस च्या या पर्वात धमाल उडवून देणार हे मात्र नक्की…
अभिनेते किरण माने यांची फेसबुक पोस्ट जशी आहे तशी…
…माझा इस्वास हाय तुमी माझी साथ सोडनार नाय ! मानूस हाय मी, माणसासारखा वागनार तिथं. मनापास्नं. कुठलंच ढोंग नाय करनार. खेळ हाय त्यो. स्विकारलाय तर जीव लावून खेळनार. ढिला पडनार नाय. हसनार, हसवनार, चिडनार, चिडवनार, भांडनार, वाद घालनार, मैत्री केलीच तर ‘दिल से’ करनार…ती निभावनार. एखाद्यानं पंगा घेतला तर त्याला त्याची जागा दाखवायला कमी नाय पडनार.
…गावाकडचा गडी हाय. शेतकरी कुटूंबातला. रानात फिरलेला, ढेकळं तुडवलेला. नदीत,विहिरीत पोहलेला. एका गोष्टीवर कंट्रोल ठेवायचा जिवापाड प्रयत्न करावा लागनारंय दोस्तांनो. ‘शिवी’ ! ‘शिवी’ हा आमच्या बोलीतला अविभाज्य भाग हाय. त्या शिव्यांचा अर्थ नस्तो डोक्यात. एक एक्सप्रेशन म्हनून ती बाहेर येती एवढंच. आवो आमी तर लै छोटी मान्सं, आमच्या पहाडासारख्या तुकोबारायाच्या अभंगातबी तुमाला शिव्या सापडत्याल.
निव्वळ मनातली भडास व्यक्त करन्याचं साधन म्हनून शिवी येती तोंडात. पन त्याचा तिथं ‘इश्यू’ हुईल.. माझ्याविरूद्ध शस्त्र म्हनून वापर हुईल, हे म्हायतीय मला. कारन मी बी लै शिवराळ हाय. भांडताना मला त्या सवयीवर लगाम घालायला लागनार… ते करीन. …माझ्या भावांनो आनि बहिनींनो, मी तुमचं मनोरंजन करन्यात कनभरबी कमी पडनार नाय. माझ्याकडनं चुका झाल्या तर त्या पोटात घ्याल तुमी हे बी म्हायतीय मला.
मला एक महत्त्वाचं सांगावंसं वाटतंय. मी तुकोबारायांवर कायम लिहीत असतो. तुकोबा माझ्या श्वासात हाय. मी गौतम बुद्धांवर व्याख्यान देतो. छ. शिवराय, छ. शंभूराजे यांच्यावर व्याख्यानं देतो. महाराष्ट्रातल्या गांवोगांवी जाऊन महात्मा फुले, लोकराजा शाहू महाराज, भारतरत्न डाॅ. बाबासाहेब आंबेडकर यांच्या विचारांची पेरणी करतो. या सगळ्या महामानवांचे विचार माझ्या रक्तात हायेत.
पन एक लक्षात ठेवा, सामान्य मानूस ज्या चुका करतो, त्या माझ्याकडनं बी होत्यात. मी आदर्श असल्याचा मुखवटा घालून नाय खेळनार. अभिनेता, सेलिब्रिटी म्हनून ‘बिग बाॅस’सारख्या शो मध्ये जाताना मी केवळ एक त्या शो चा खेळाडू म्हनून खेळीन.
“बाहेर व्याख्यानांत महामानवांवर बोलतो आनि शो मध्ये बघा कसा भांडतोय.” असा गोंधळ करून घेऊ नका. मी बिग बाॅसच्या घरात केवळ या शो च्या ‘फाॅरमॅट’चं पालन करून खेळनारा एक खेळाडू असेन. खेळाडू, एक अभिनेता म्हनूनच माझ्याकडं बघा आनि शो चा आनंद घ्या.
