शिरूर – महान्यूज लाईव्ह
देशामध्ये व राज्यामध्ये पहिल्यांदा सहकार महर्षी शिवाजीराव नारायणराव नागवडे सहकारी साखर कारखाना हा ‘बीओटी’ अर्थात बांधा, वापरा व हस्तांतरीत करा या तत्वावर प्रेसमडपासून सी.बी.जी. गॅस तयार करण्याचा व बगॅसपासुन ब्रिकेट तयार करण्याचा प्रकल्प हाती घेणार असुन असा प्रकल्प हाती घेणारा नागवडे साखर कारखाना हा देशातील पहिला सहकारी साखर कारखाना असल्याची माहिती कारखान्याचे राजेंद्र नागवडे यांनी दिली.
नागवडे कारखाना कार्यस्थळावर पत्रकार परिषद आयोजित करण्यात आली होती. यावेळी कारखान्याचे उपाध्यक्ष बाबासाहेब भोस यांच्यासह संचालक उपस्थित होते. यावेळी बोलताना नागवडे यांनी सांगितले की, कारखान्यामध्ये प्रतिवर्षी तयार होणाऱ्या ‘प्रेसमड’पासुन कारखान्याला सुमारे एक कोटी रुपयापर्यंत उत्पन्न मिळते. परंतु हा प्रकल्प उभारल्यानंतर त्यापासून सुमारे ४ कोटी रुपये कारखान्यास मिळणार आहे.
या प्रकल्पाची सी.बी.जी. गॅस निर्मीतीची प्रतिदिन क्षमता ५ मे.टन असुन या प्रकल्पामध्ये तयार होणारा गॅस वाहनांना इंधन म्हणून वापरला जाणार आहे.सदरचा सी . बी . जी . गॅस हा कारखान्याने शासनाचे दराप्रमाणे घेवून त्याची आऊटलेटद्वारे विक्री केली तर त्यामाध्यमातून सुमारे १ कोटी रुपयांचे उत्पन्न कारखान्यास मिळणार आहे.
अशा प्रकारे कारखान्यास दरवर्षी ४ ते ५ कोटी नफा मिळणार आहे.त्याचप्रमाणे बगॅसपासुन प्रतिदिन १०० मेट्रिक टन क्षमतेचा हायडेसिग्नेटेड स्टॉल्क ( ब्रिकेट) बनविणेचा प्रकल्प नव्याने हाती घेत आहोत . सध्या बगॅसपासून साधारण १३०० ते १४०० प्रतीटन उत्पन्न कारखान्यास मिळते . परंतु सदरचा प्रकल्प हाती घेतलेनंतर सुरुवातीस हा दर सुमारे २००० ते २१०० रुपयापर्यंत मिळेल व नंतर यादरामध्ये आणखी ८०० ते १००० रुपयापर्यंत वाढ होईल. त्यामुळे कारखान्यास सुमारे ३ ते ४ कोटी रुपये नफा होणार आहे.
भविष्यात बगॅसचे व प्रेसमडचे दर वाढले तर त्याप्रमाणांत उत्पन्नामध्ये वाढ होणार आहे. या दोन्ही प्रकल्पाची संचालक मंडळाने समक्ष पहाणी करुन व गेल्या सहा महिन्यांपासून त्याचा अभ्यास करुन हे दोन्ही प्रकल्प प्रायोगिक तत्वावर हाती घेण्याचा निर्णय घेतलेला आहे. हे दोन्ही प्रकल्प उभे करत असताना त्यामध्ये कारखान्याची कोणत्याही प्रकारची गुंतवणुक असणार नाही. त्याकरीता कारखाना फक्त जागा उपलब्ध करुन देणार आहे. सदर कंपनीशी १५ वर्षाचा कराराचा कालावधी पुर्ण झाल्यानंतर तो प्रकल्प कारखान्याकडे हस्तांतरीत करण्यात येणार आहे.
