सुरेश मिसाळ : महान्यूज लाईव्ह
इंदापूर – पुणे जिल्ह्याच्या उत्तर भागात एकूण ६१ ग्रामपंचायतच्या पंचवार्षिक निवडणुकीचा आज लागलेल्या निकालात ४६ ग्रामपंचायतीवर राष्ट्रवादी काँग्रेस पक्षाच्या ताब्यात आल्याचा दावा राष्ट्रवादी काँग्रेस पक्षाचे पुणे जिल्हाध्यक्ष प्रदीप गारटकर यांनी केला.
गारटकर म्हणाले की, पुणे जिल्ह्यातील उत्तर भागात जुन्नर तालुक्यातील एकूण ३६ ग्रामपंचायतींपैकी राष्ट्रवादी काँग्रेसच्या २६ ग्रामपंचायतींवर राष्ट्रवादीचे वर्चस्व सिद्ध केले आहे. तर आंबेगाव तालुक्यातील एकूण १८ पैकी १४ ग्रामपंचायत या राष्ट्रवादी काँग्रेसच्या विचाराच्या आल्या आहेत. खेड तालुक्यात पाच ग्रामपंचायतींपैकी चार ग्रामपंचायती व भोर तालुक्यातील दोन्हीही ग्रामपंचायती राष्ट्रवादी काँग्रेस पक्षाच्या विचाराच्या आलेल्या आहेत.
पक्षाचे अध्यक्ष शरद पवार, राज्याचे विरोधी पक्ष नेते अजित पवार ,खासदार सुप्रिया सुळे, राज्याचे माजी गृहमंत्री दिलीप वळसे पाटील, आमदार अतुल बेनके ,आमदार दिलीप मोहिते,जिल्हा परिषदेचे उपाध्यक्ष रणजीत शिवतारे, विक्रम खुटवड यांच्या विचाराने विकास कामाच्या जोरावर ग्रामीण भागापर्यंत राष्ट्रवादी काँग्रेस पक्षाचे काम रुजले आहे हे ग्रामपंचायतीच्या निकालातून दिसून येत आहे.
या ग्रामपंचायतीच्या माध्यमातून गावांचा सर्वागीण विकास करण्यासाठी राष्ट्रवादी कॉग्रेस पक्ष सर्वोतोपरी मदत करणार असल्याचे जिल्हाध्यक्ष गारटकर यांनी सांगितले.
