इंदापूर तालुक्यातील जनावरांना होणारा लंपी आजार हद्दपार करण्यासाठी युध्दपातळीवर प्रयत्न सुरु… पशुवैद्यकीय अधिकारी व कर्मचाऱ्यांनी शेतकऱ्यांच्या घरोघरी जाऊन भेट द्यावी : आमदार दत्तात्रय भरणे! इंदापूर तालुक्यात आतापर्यंत 99 जनावरांना लंपी आजाराची लक्षणे : पैकी 51 जनावरांचा आजार पूर्णपणे बरा
सुरेश मिसाळ : महान्यूज लाईव्ह
इंदापूर : लंपी या जनावरांना होणा-या आजाराने इंदापूर तालुक्यात शिरकाव केला आहे, आतापर्यंत तालुक्यात 99 जनावरांना लंपी आजार झाला होता, त्यापैकी 51 जनावरांचा आजार पूर्णपणे बरा झाला आहे. आजाराबाबत लोकांमध्ये गैरसमज पसरू नये तसेच आजाराबाबतची योग्य खबरदारी घेतली जावी व माहिती दिली जावी, तसेच प्रत्येक शेतकऱ्यांना मार्गदर्शन करावे म्हणून स्वतः पशुवैद्यकीय अधिकारी कर्मचारी यांनी घरोघरी जाऊन भेट द्यावी अशा सूचना माजी राज्यमंत्री व इंदापूरचे आमदार दत्तात्रय भरणे यांनी प्रशासनास दिल्या.
इंदापूर तालुक्यामध्ये गाय वर्ग व म्हैस वर्ग जनावरांची संख्या जवळपास 1लाख 70 हजार 465 इतकी आहे. तालुक्यामध्ये लंपी व्हायरसची आत्तापर्यंत लागण 99 जनावरांना झाली. त्यापैकी आतापर्यंत 51 जनावरांवर उपचार झाल्यावर ह्या पूर्णपणे बरे झालेले आहेत. सद्यस्थितीमध्ये 43 जनावरांमध्ये लक्षणे आहेत.
आतापर्यंत पाच जनावरांचा मृत्यू झालेला आहे. या मध्ये मोठ्या मृत जनावरांना 35 हजार रुपये इतके तर लहान जनावरांना 16 हजार रुपये रक्कम शासनामार्फत नुकसान भरपाई म्हणून देणार आहे. अशी माहिती आमदार दत्तात्रय भरणे यांनी दिली.
इंदापूर तालुक्यामध्ये प्रामुख्याने शहाजीनगर भागात या आजाराचा प्रादुर्भाव मोठ्या प्रमाणावर झालेला आढळला आहे. याठिकाणी जवळपास 21 जनावरे लंपी आजाराने बाधित झालेली असल्याची माहितीही त्यांनी दिली. याचबरोबर कळस,कळंब, लासुर्णे, उद्धट, कुंभारगाव, डाळज, भिगवण, निरगुडे, सणसर या गावांमध्ये लंपी आजार झालेली जनावरे आढळून आली आहेत.
आतापर्यंत तालुक्यामध्ये 27 दवाखान्यांमार्फत काम चालू आहे. 16 इ. पी. सेंटर आहेत. तसेच आजपर्यंत 40 हजार लसींचे डोस प्राप्त झाले होते. त्याचेही लसीकरण पूर्ण झालेले आहे. त्याचबरोबर जिल्हा परिषदेचे मुख्य कार्यकारी अधिकारी आयुष्य प्रसाद यांना फोन करून तात्काळ जिल्हा परिषदेच्या वतीने 50 हजार लसींचे डोस देण्याची व्यवस्था होईल असे आमदार दत्तात्रय भरणे यांनी सांगितले.
इंदापूर तालुक्यामध्ये प्रामुख्याने शहाजीनगर भागात या आजाराचा प्रादुर्भाव मोठ्या प्रमाणावर झालेला आढळला आहे. याठिकाणी जवळपास 21 जनावरे लंपी आजाराने बाधित झालेली असल्याची माहितीही त्यांनी दिली.
पशुपालकांनी जनावरांच्या अंगावर पुरळे येणे, ताप येणे, नाकातून स्त्राव येणे अशी लक्षणे दिसल्यास तात्काळ पशुवैद्यकीय अधिकारी यांच्याशी संपर्क साधावा असे आवाहन आमदार भरणे यांनी केले.
याबाबत योग्य उपाययोजना करण्याबाबत सूचना देण्यात आल्या आहेत. तसेच 17 व 18 सप्टेंबर रोजी तालुक्यामध्ये निर्जंतुकीकरण तसेच डास किडे मारण्याकरिता फवारणी करणार आहेत. यावेळी इंदापूर चे गट विकास अधिकारी विजयकुमार परीट तसेच पशुवैद्यकीय अधिकारी डॉ. राम शिंदे आदी अधिकारी उपस्थित होते.
