इंदापूर – महान्यूज लाईव्ह
आज इंदापूरात काय झाडी, काय डोंगार फेम सांगोल्याचे आमदार शहाजी बापू पाटील यांनी जोरदार बॅटींग केली. स्वतःवरच टिका करताना त्यांनी माजी सहकारमंत्री हर्षवर्धन पाटील यांनाही सोडले नाही. त्यांच्यासोबतचे लहानपणीचे किस्से सांगताना त्यांनी एक किस्सा असा सांगितला की, सारे सभागृह काही काळ फक्त हसत होते.
पाटील म्हणाले, वारकरी सांप्रदायाचा वारसा असणारे इंदापूर तालुक्यातील बावडा गावचे पाटील कुटुंबीय आमचे नातेवाईक असल्याने मी महिना महिना बावड्यात असायचो. माजी मंत्री हर्षवर्धन पाटील यांच्याबरोबर कबड्डी, लोमपाट कितींदा खेळलोय. यात अनेक वेळा भांडणं झाली. खेळात आम्ही खरं जिंकल्यालो असायचो, पण हर्षुभाऊ चिडकं! पहिल्यापासून हारलं तरी आम्हाला बदाबद मारायचं !
आता हे लाबच्या लांब असलेलं ते.. आम्हाला काय ऐकतयं काय? पण भाऊ चिडलं की, आम्ही पळतं सुटायचो. मी तर एकदा भितीपोटी नारळाच्या झाडावरचं चढून बसलू अनं म्हणलं, ये आता कसा वर येतोय बघतोच.असं म्हणताच उपस्थितांमध्ये एकचं हशा पिकला.
त्यांनी एक महत्वाची आठवण सांगितली, 1995 साली मला सांगोल्यातून प्रथम उमेदवारी मिळाली. याच दरम्यान इंदापूर तालुक्यात देखील काँग्रेसमधून दुसऱ्या कोणालातरी उमेदवारी मिळणार होती. मात्र मी लाला चांदणे नावाच्या मित्राला एक कानमंत्र दिला की, हर्षवर्धन पाटील यांना अपक्ष उभे करा असा सूर बैठकीत लाव असं सांगितलं आणि काम ओक्के झालं. 1995 ला मी आणि हर्षवर्धन एकाच वेळी विधानसभेत गेलो.
हर्षवर्धन पाटील आता तुम्ही पराभवाचे लयं मनावर घेऊ नका. उद्या होणाऱ्या लोकसभा किंवा विधानसभेला माजी मंत्री हर्षवर्धन पाटील यांना न पडणारी दहा हजार मते मी पाचचं सभेत मिळवून देणार, अन्यथा राजाराम पाटलची औलाद नायं. कर्मयोगी शंकरराव पाटील यांचं स्वप्न साकार करण्यासाठी येणाऱ्या निवडणुकीत हर्षवर्धन पाटील यांना घवघवीत मताधिक्याने विजयी करावं, त्यासाठी भाषणाला मी येतो काळजी करू नका. तुम्हाला न पडणारी दहा हजार मते मी पाचचं सभेत नाही मिळवून दिली, तर राजाराम पाटलाची औलाद नाय.
