बंदुकीचा वापर करत फायरींग करून तीन कोटी साठ लाख रूपयांचा दरोडा टाकणाऱ्या टोळीचा ७२ तासांत पर्दाफाश, स्थानिक गुन्हे शाखा व इंदापुर पोलीस स्टेशन यांची संयुक्त कारवाई
पुणे : महान्यूज लाईव्ह
इंदापूरच्या वरकुटे पाटी येथे गुजरातच्या व्यापाऱ्याच्या नोकरांची गाडी अडवून तीन कोटी साठ लाख रुपये लुटले होते. त्यामुळे फक्त इंदापूरतच नव्हे तर संपूर्ण राज्यभरात खळबळ उडाली होती. मात्र पोलिसांनी शिताफीने तपास करत यातील आरोपी निष्पन्न केले आहेत. अर्थात तीन कोटी साठ लाखांची रोकड लुटलेल्या आरोपींकडून आतापर्यंत पोलिसांनी एक कोटी 43 लाख एवढीच रक्कम हस्तगत केलेली आहे.
भावेशकुमार अमृत पटेल, (रा. कहोडा, ता. उंझा, जि. मेहसाना, गुजरात) हे कुरीअर सर्व्हिसेसचे वितरक नांदेड, लातूर व सोलापूर येथील पार्सल घेवून २६ ऑगस्ट २०२२ रोजी पहाटेच्या वेळी सोलापूर येथून मुंबई येथे जाणेसाठी निघाले होते. इंदापुर टोल नाका पास करून पुढे वरकुटे पाटी येथील गतीरोधक जवळ गाडीचा वेग कमी झाल्याने पहाटे २:३० च्या सुमारास ६ अनोळखी इसमांनी फिर्यादीचे गाडीजवळ येवून त्यांना लोखंडी रॉड दाखवत अडविण्याचा प्रयत्न केला.
फिर्यादी यांनी त्यांची गाडी भरधाव वेगाने पुढे काढली. त्यावेळी त्यांच्या गाडीचा दोन चारचाकी वाहनांनी पाठलाग सुरू केला. वरकुटे पाटी पासून पुढे सात ते आठ किलोमीटर अंतरावर पोहोचल्यानंतर पाठलाग करणाऱ्या गाडीतून फिर्यादीच्या स्कॉर्पिओ गाडीवर बंदुकमधून फायरींग करण्यात आली.
त्या दरम्यान पाठलाग करणाऱ्या एका चारचाकी वाहनाने स्कॉर्पिओ गाडीला आडवी मारून स्कॉर्पिओ थांबविली. त्यावेळी एकुण सहा अनोळखी इसमांनी फिर्यादीस व त्याच्या सोबत असलेल्या विजयभाई सोलंकी यास मारहाण करून पटेल यांना स्कॉर्पिओ मधुन उतरवुन त्यांचेकडील दुसऱ्या गाडीत बसविले. त्यानंतर पुढे नेऊन गाडीमध्ये ठेवलेली सर्व रोख रक्कम फिर्यादी व सोबतचे इसमाचे मोबाईल व त्यांचे खिशातील रोख रक्कम असे एकुण तीन कोटी साठ लाख सव्वीस हजार रूपयांचा माल दरोडा टाकून चोरून नेला.
त्यानंतर फिर्यादी व चालक यांना स्कार्पिओसह स्वामी चिंचोली गावाचे परीसरात सोडून दिले. झालेल्या प्रकरणावरून फिर्यादींनी इंदापुर पोलीस ठाण्यात गुन्हा दाखल केला.
सोलापुर – पुणे या मुख्य हायवे रोडवर फायरींग करून दरोडयाचा प्रकार झालेला असल्याने सदर गुन्हयाचे गांभीर्य लक्षात घेवून पोलीस अधीक्षक डॉ. अभिनव देशमुख यांनी तात्काळ स्थानिक गुन्हे शाखेचे वरीष्ठ अशोक शेळके यांना तपासाच्या सुचना व मार्गदर्शन करून गुन्हयातील आरोपी जेरबंद करून गुन्हा उघडकीस आणणेबाबत सुचना केल्या.
गुन्हयाची व्याप्ती मोठी असल्याने स्थानिक गुन्हे शाखेकडून तीन तपास पथके तयार करून त्यांना योग्य त्या सुचना व मार्गदर्शन केले तसेच इंदापुर पोलीस स्टेशनचे पोलीस निरीक्षक प्रभाकर मोरे यांच्याकडील तीन स्वतंत्र तपास पथके तयार करण्यात आली. अशी एकूण सहा तपास पथके तपास कामी तयार करण्यात आली होती.
डॉ. अभिनव देशमुख, अप्पर पोलीस अधीक्षक मिलिंद मोहिते, उपविभागीय अधिकारी गणेश इंगळे यांनी स्वतः भेट देऊन मार्गदर्शन केले. तांत्रिक विश्लेषण व गुप्त बातमीच्या आधारावर सदरचा गुन्हा सागर शिवाजी होनमाने (रा. कुर्डुवाडी ता. माढा जि.सोलापूर) याने त्याच्या इतर साथीदारांसह केला असल्याची बातमी स्थानिक शाखेच्या तपास पथकाला मिळाली.
त्या अनुषंगाने एक पथक ताबडतोब कुर्डुवाडी परीसरात रवाना केले. तपास पथकाने संशयीत इसम १) सागर शिवाजी होनमाने, वय ३४ वर्षे, रा. कुर्डुवाडी, ता. माढा, जि. सोलापूर २) बाळु उर्फ ज्योतीराम चंद्रकांत कदम, वय ३२ वर्षे, रा. कुर्डुवाडी, ता.माढा, जि. सोलापूर, ३) रजत अबू मुलाणी, वय २४ वर्षे, रा. न्हावी, ता. इंदापूर यांना ताब्यात घेतले. त्यांच्याकडील अधिक चौकशी केली असता त्यांनी इतर साथीदारासह गुन्हयाची कबुली दिली आहे.
सदर आरोपीकडे केलेल्या अधिक तपासात १) सागर शिवाजी होनमाने याच्याकडुन ७२ लाख रूपये रोख २) रजत अबू मुलाणी, याच्याकडून ७१ लाख २० हजार रूपये असे एकुण १ कोटी ४३ लाख २० हजार रूपये जप्त करण्यात आले आहेत. त्यादरम्यान स्थानिक गुन्हे शाखा व इंदापुर पोलीस स्टेशनचे प्रत्येकी एक असे दोन पथक तात्काळ राजस्थान येथे रवाना करण्यात आले होते.
त्या पथकाने गुन्हयातील सहभाग असणारे आरोपी नामे १) गौतम अजित भोसले, वय ३३ वर्षे, रा. वेने, ता. म्हाडा, जि. सोलापुर, २) किरण सुभाष घाडगे, वय २६ वर्षे, रा. लोणीदेवकर, ता. इंदापुर, जि. पुणे, ३) भुषण लक्ष्मीकांत तोंडे, वय २५ वर्षे, रा. लोणीदेवकर, ता. इंदापुर, जि. पुणे यांना राजस्थान उदयपुर येथील प्रतापनगर पोलीस ठाणे हद्दीत स्थानिक पोलीसांच्या मदतीने राजस्थान येथून ताब्यात घेतले आहे.
सदरची कामगिरी मा. डॉ. अभिनव देशमुख, मिलींद मोहिते, गणेश इंगळे यांच्या मार्गदर्शनाखाली स्थानिक गुन्हे शाखेचे वरीष्ठ पोलीस निरीक्षक अशोक शेळके, पोलीस उपनिरीक्षक अमित सिदपाटील, पोलीस उपनिरीक्षक गणेश जगदाळे, रविराज कोकरे, तुषार पंदारे, बाळासाहेब करांडे, सचिन घाडगे, अजय घुले, जनार्दन शेळके, राजु मोमीण, विजय कांचन, असिफ शेख, अभिजीत एकशिंगे, स्वाप्निल आहीबळे, अक्षय नवले, प्रमोद नवले, , जयेश पाथरकर, रविंद्र पाटमास तसेच बारामती शहर येथील कल्याण खांडेकर, प्रभाकर मोरे, प्रकाश पवार, महेश माने, सुधीर पांडुळे, सलमान खान, विशाल चौधर, सुरेंद्र वाघ, मनोज गायकवाड, सचिन बोराडे, मोहमंद आली मड्डी, बापू मोहीते, लक्ष्मण सूर्यवेशी, दिनेश चोरमले, विनोद काळे, सुरज गुंजाळ यांनी केली. तसेच प्रतापनगर पोलीस ठाणे राजस्थान येथील पोलीस निरीक्षक दर्शनसिंग राठोड, बुटी राम, गोविंद सिंग, रूद्रा प्रताप सिंग यांनी राजस्थान येथे आरोपी अटक करणेसाठी मदत केली.
