बारामतीत दोनपेक्षा अधिक गुन्हे दाखल असलेल्यांची पोलिसांनी केली कुंडली तयार! मोक्का, तडीपारीसह झोपडपट्टी दादा कायद्यानुसार कारवाई! मळदचा एकजण तुरूंगात!

एम पी डी ए कायद्याप्रमाणे मळद चा गुंड “भोऱ्या ” एक वर्षासाठी कारागृहात स्थानबद्ध.

बारामती : महान्यूज लाईव्ह 

बारामती शहरामध्ये काही गुन्हेगार वारंवार गुन्हे करत असतात, त्यांना प्रचलित कायद्याचे काहीच वाटत नाही. अशा दोनपेक्षा जास्त गुन्हे दाखल असणाऱ्या गुन्हेगारांची यादी बारामती शहर पोलिसांनी अद्ययावत केलेली आहे. यामध्ये तडीपारी, मोक्का अशी कारवाई करण्याची तयारी केलेली आहे

गेल्या दोन वर्षापासून मळद (ता. बारामती) या ठिकाणी राहून शहरात व परिसरात दादागिरी करणारा आकाश उर्फ अक्षय उर्फ भोऱ्या  बापूराव जाधव (वय 27 वर्ष) हा  वारंवार जेलमध्ये जाऊन सुद्धा त्यात सुधारणा होत नव्हती आणि त्यामुळे दहशत कमी होत नव्हती व त्याच्यावर  दरोडा, जबरी चोरी, खंडणी, मालमत्तेची तोडफोड, नासधूस, मारहाण, शिवीगाळ, जीवे मारण्याची धमकी, चोरी, जुलूम, जबरदस्ती, हत्यारासहित लुटमार या प्रकारचे गुन्हे दाखल आहेत.

वारंवार अटक होऊनसुद्धा त्यात सुधारणा होत नव्हती. उलट त्याला घाबरून सलाम सुरू झाला होता. आगामी निवडणुकासाठी लोकांमधे दहशत माजवण्यासाठी  तो तयार होता. असे त्याच्या कृतीतून दिसून येत होते.  दहीहंडीमध्ये सुद्धा त्याच्या दहीहंडी आयोजनावरून बराच वादंग निर्माण झालेला होता.

असा गुन्हेगार उदयाला येऊ नये म्हणून त्याला महाराष्ट्र झोपडपट्टी कायदा प्रमाणे स्थानबद्ध करण्याबाबतचा प्रस्ताव पोलीस निरीक्षक सुनील महाडिक यांनी उपविभागीय पोलीस अधिकारी गणेश इंगळे व अप्पर पोलीस अधीक्षक मिलिंद मोहिते यांच्यामार्फत पोलीस अधीक्षक डॉ. अभिनव देशमुख यांच्याकडे सादर केला. त्यांनी या प्रस्तावाचे अवलोकन करून जिल्हाधिकारी राजेश देशमुख यांच्याकडे शिफारस केली व जिल्हाधिकाऱ्यांनी तात्काळ त्यास मंजुरी दिली. आता त्याला येरावडा मध्यवर्ती कारागृह या ठिकाणी एक वर्षासाठी स्थानबद्ध करण्यात आले आहे. 

बारामती पोलिसांना हलक्यात घेऊ नका…

बारामती व परिसरातील गुंडांना हा सूचक इशारा आहे आपण वारंवार गुन्हे कराल आपल्या वर्तणुकीत सुधारणा होणार नसेल तर आपण सुद्धा या कायद्याप्रमाणे स्थानबद्ध व्हाल. पूर्वी एखाद्या गुन्हेगाराने गुन्हा केला असेल आणि त्यासोबत एखाद्या नवीन  युवकाने भावनेच्या भरात सोबत जाऊन गुन्हा केला, तर त्याला सुद्धा मोक्का सारख्या गंभीर गुन्ह्याची कारवाई होऊ शकते व जीवन उध्वस्त होऊ शकते. त्यामुळे दाखल होणाऱ्या कोणत्याही गुन्ह्याची कारवाई आपण हलक्यात घेऊ नका. 

हा प्रस्ताव बारामती शहर पोलीस ठाण्याचे सहाय्यक पोलीस निरीक्षक कुलदीप संकपाळ, युवराज घोडके, देवेंद्र खाडे, संजय जगदाळे, दशरथ कोळेकर, कल्याण खांडेकर, अतुल जाधव, दशरथ इंगोले, संजय जाधव, प्रमोद राऊत, बंडू कोठे,  तुषार चावान, मनोज पवार, चालक  यशवंत पवार यांनी केली आहे.