बारामती महान्यूज लाईव्ह
बारामती, इंदापूर, दौंड व पुरंदर तालुक्यात असलेल्या औद्योगिक कंपन्यांमधील नोंदणीकृत कामगारांसाठी ईएसआयसी हॉस्पिटल बारा्मतीत होण्यासाठी बारामती इंडस्ट्रियल मॅन्युफॅक्चरर्स असोसिएशनचे शिष्टमंडळ धनंजय जामदार यांच्या नेतृत्वाखाली ज्येष्ठ नेते शरद पवार यांना भेटले. या हॉस्पिटलची निकड लक्षात घेत पवार यांनी केंद्रीय कामगारमंत्री भूपेंद्र यादव यांच्याशी बोलून हा प्रश्न मार्गी लावण्याचे आश्वासन दिले.
केंद्र शासनाच्या अंतर्गत कर्मचारी राज्य विमा महामंडळाकडे बारामती व परिसरातील नोंदणीकृत कामगारांची संख्या मोठी आहे. त्यामुळे बारामतीमध्ये ESIC हॉस्पिटल होणे गरजेचे आहे. याबाबत बारामती इंडस्ट्रियल मॅन्युफॅक्चरर्स असोसिएशन च्या शिष्टमंडळाने पवार यांची भेट घेतली. या भेटीदरम्यान बारामतीच्या विस्तारित एमआयडीसीमध्ये ऑटोमोबाईल क्षेत्रातील एखादा मोठा उद्योग आणण्याचा सकारात्मक विचार करू असेही पवार याप्रसंगी म्हणाले.
बारामती इंडस्ट्रियल मनुफॅक्चरर्स असोसिएशन चे अध्यक्ष धनंजय जामदार, सचिव अनंत अवचट, सदस्य महादेव गायकवाड, अंबीरशाह शेख वकील, संभाजी माने, उद्योजक शिवराज जामदार आदींच्या शिष्टमंडळाने पवार यांची भेट घेऊन बारामती एमआयडीसी औद्योगिक क्षेत्रातील विविध विषयांवर चर्चा करून निवेदन दिले.
यासंदर्भात धनंजय जामदार म्हणाले की, कर्मचारी राज्य विमा महामंडळ कायदा बारामती परिसराला 2016 पासून लागू करण्यात आलेला असून या कायद्यानुसार आस्थापना व कामगार मिळून वेतनाच्या साडेसहा टक्के रक्कम ESIC कडे भरावी लागते.
या माध्यमातून विमा महामंडळाने कोट्यावधी रुपये आजपर्यंत वसूल केलेले आहेत. या शुल्कातून कामगार व त्याच्या कुटुंबीयांना विनामूल्य दर्जेदार वैद्यकीय सेवा सुविधा उपलब्ध करून देणे महामंडळावर बंधनकारक आहे, परंतु विमा महामंडळाचे बारामतीत हॉस्पिटल नसल्यामुळे कामगारांना या हक्काच्या वैद्यकीय सुविधेपासून वंचित रहावे लागत आहे.
काही खाजगी हॉस्पिटल बरोबर महामंडळाने करार केले आहेत परंतु त्यांच्या सेवा खर्चिक व असमाधानकारक असल्याच्या कामगारांच्या तक्रारी आहेत. यामुळे नाईलाजास्तव कामगारांना उपचारासाठी पुण्यातील ई एस आय सी हॉस्पिटल मध्ये जावे लागते. ही बाब धनंजय जामदार व त्यांच्या सहकाऱ्यांनी पवार यांच्या निदर्शनास आणून दिली.
