सुरेश मिसाळ : महान्यूज लाईव्ह
इंदापूर : पुणे जिल्ह्यात वाहन चोऱ्या आणि घरफोड्या करून धुमाकूळ घालणाऱ्या शिकलकर टोळीला भिगवण पोलिसांनी जेरबंद केले. या कामगिरीमध्ये तीन आरोपींना ताब्यात घेण्यात आले असून घरफोडी व वाहन चोऱ्यांमध्ये चाळीस गुन्ह्यांत त्यांचा सहभाग असल्याची भिगवण पोलीस ठाण्याचे सहायक पोलीस निरीक्षक दिलीप पवार यांनी दिली.
भिगवण पोलिसांच्या या दमदार कामगिरीचे कौतुक होत आहे. शिकलकर टोळीतील जितसिंग राजपालसिंग टाक (वय २६ वर्ष, रा. वैदवाडी, हडपसर, पुणे), लकीसिंग गबरसिंग टाक (वय २० वर्ष, रा. यवत, ता. दौंड, जि. पुणे) आणि विधीसंघर्षग्रस्त (अल्पवयीन) निहालसिंग मन्नुसिंग टाक (वय १७ वर्ष, रा. वैदवाडी, हडपसर, पुणे) या तिघा जणांना भिगवण पोलिसांनी तुळजापूर (जि. उस्मानाबाद) येथून जेरबंद केले.
त्यांच्याकडून पुणे शहरासह, पिंपरी चिंचवड, इंदापूर, भिगवण आणि हवेली परिसरात केलेल्या वाहन चोऱ्या व घरफोड्यांचे जवळपास ४० गुन्हे उघडकीस आले आहेत. भिगवण पोलिसांनी तुळजापूर पोलिसांच्या मदतीने ही कारवाई केली असून, भिगवण पोलिसांची ही आतापर्यंतची सर्वात मोठी कामगिरी मानली जात आहे.
१९ आणि २० जुलै दरम्यानच्या रात्री भिगवण येथून चोरीला गेलेली स्कॉर्पीओ (एमएच १४ बीएक्स ९७६४) घेऊन चोरटे तुळजापूर (जि. उस्मानाबाद) येथे देवदर्शनासाठी गेल्याची माहिती भिगवण पोलिसांच्या गुन्हे शोध पथकाला मिळाली होती. त्या अनुषंगाने भिगवण पोलिसांनी तुळजापूर पोलिसांच्या मदतीने सापळा रचून वरील तिघांना चोरीला गेलेल्या स्कॉर्पीओसह बुधवारी (२६ जुलै) जेरबंद केले.
या तिघांकडे सखोल चौकशी केली असता, त्यांनी पुणे जिल्हातील इंदापूर आणि हवेली पोलीस ठाण्यात दाखल असलेले २, पुणे शहर आयुक्तालयाच्या हद्दीत दाखल असलेले ३० गंभीर आणि पिंपरी चिंचवड आयुक्तालयाच्या हद्दीत दाखल असलेल्या ७ गंभीर गुन्ह्यांची कबुली दिली असल्याचे भिगवण पोलिसांनी म्हटले आहे.
सदरची कामगिरी भिगवण पोलीस ठाण्याचे पोलीस अधिकारी दिलीप पवार, सहा पोलीस निरीक्षक, भिगवण पो.स्टे. भिगवण पो.स्टेचे पोलीस उपनिरीक्षक रूपेश कदम, विनायक दडस पाटील, पोलीस अमलदार समीर करे, सचिन पवार, महेश उगले, अंकुश माने, हसीम मुलाणी, सचिन निकम यांनी केली असून, सदर गुन्ह्याचा तपास पोलीस अमलदार महेश उगले करीत आहेत.
