श्रीगोंदा सत्र न्यायालयाचा निकाल; कर्जत पोलिसांनी आरोपीस तात्काळ अटक करून केले होते, दोषारोपपत्र दाखल!
कर्जत : महान्यूज लाईव्ह
तालुक्यातील एका अल्पवयीन मुलीस पळवून नेऊन बारामती तालुक्यातील तांदुळवाडी परिसरात अत्याचार केल्याप्रकरणी कर्जत तालुक्यातील दुर्गाव येथील तीन आरोपींना श्रीगोंदा सत्र न्यायालयाचे न्यायाधीश श्री मुजीब शेख यांनी सक्तमजुरीसह, कैदेची शिक्षा सुनावली आहे. फिरोज चाँद मुलाणी, ओंकार शिवाजी कुलथे, अतुल बाळू आढाव सर्व राहणार दुरगाव (ता.कर्जत) अशी या प्रकरणातील आरोपींची नावे आहेत.
१ जुन २०२१ रोजी हा प्रकार घडला होता. कर्जत तालुक्यातील अल्पवयीन पीडितेला फिर्यादीच्या कायदेशीर रखवालीतून पळवून नेऊन तिला बारामती तालुक्यातील तांदूळवाडी येथे भाड्याच्या खोलीत ठेऊन पीडितेच्या इच्छेविरुद्ध जबरी संभोग केला होता. या प्रकरणात आरोपीला मुलगी पळवून नेण्यासाठी टेंपोगाडी उपलब्ध करूम पळवून नेण्यासाठी मदत केली होती.
याबाबत महिलेने कर्जत पोलिसांत फिर्याद दिली होती. याप्रकरणी पोलिसांनी बाल लैंगिक अत्याचार प्रतिबंधक कायद्यासह अपहरणाचा गुन्हा दाखल केला होता. गुन्ह्याचा तपास पूर्ण झाल्यानंतर न्यायालयात दोषारोपपत्र तातडीने दाखल करण्यात आले होते. सरकारी पक्षाच्या वतीने सरकारी वकील म्हणून पुष्पा कापसे यांनी काम पाहिले, त्यांना सुमित पाटील यांनी फिर्यादीचे वतीने मदत केली.
मुख्य आरोपी फिरोज मुलाणी यावर ३७६ (२) (एन) अन्वये १० वर्षे सक्तमजुरी, ५ हजार दंड, दंड न भरल्यास ३ महिने साधी कैद. तसेच भा.द.वी कलम ३६३ अन्वये ३ वर्षे शिक्षा व हजार रुपये दंड,दंड न भरल्यास एक महिना साधी कैद व बाल लैंगिक अत्याचार कायदा कलम ६ अन्वये २० वर्षे सक्तमजुरी व ५ हजार रुपये दंड, दंड न भरल्यास ४ महिने साधी कैद अशी शिक्षा सुनावली आहे, तर त्याला मदत करणारे आरोपी ओंकार शिवाजी कुलथे, अतुल बाळू आढाव यांना प्रत्येकी ३ वर्षे शिक्षा व हजार रुपये दंड, दंड न भरल्यास १ महिना साधी कैद अशी शिक्षा सुनावली आहे.
पोलीस अधीक्षक मनोज पाटील अप्पर पोलीस अधीक्षक सौरभ कुमार अग्रवाल उपविभागीय पोलीस अधिकारी अण्णासाहेब जाधव यांच्या पोलीस यांच्या मार्गदर्शनाखाली निरीक्षक चंद्रशेखर यादव यांच्या मार्गदर्शनाखाली पोलीस उपनिरीक्षक भगवान शिरसाठ, पोलीस हवालदार तुळशीदास सातपुते, देविदास पळसे यांनी तपास अधिकारी म्हणून काम पाहिले. आशा खामकर, नाना दरेकर यांनी सरकारी पक्षास सहकार्य केले.
