लोणार तालुक्यातील कुंडलस येथील दुर्दैवी घटना
संदीप मापारी पाटील, बुलढाणा
लोणार शहरापासून अगदी हाकेच्या अंतरावर असणाऱ्या कुंडलस गावचे माजी पोलीस पाटील एकनाथ शंकर काकडे (वय ६२ वर्ष) यांचा दिनांक ६ जुलै २०२२ रोजी पहाटे एक ते दोन वाजेदरम्यान घराला लागलेल्या आगीत जुने माळवद जळून अंगावर पडले, त्यात गंभीर भाजून दुर्दैवी अंत झाल्याची घटना घडली.
याबाबत सविस्तर असे की, कुंडलस येथील माजी पोलीस पाटील एकनाथ काकडे हे आपल्या राहत्या घरी सायंकाळी जेवण झाल्यानंतर झोपी गेले व त्यांचे पत्नी, मुले, सुना हे समोरील घरात झोपले होते. अचानक मध्यरात्री घराला अचानक आग लागल्याचे लक्षात आले. मात्र जुनी माळवद असल्याकारणाने सदर माळवद अंगावर कोसळल्याने व वरून आगीच्या लाटा सुरू असल्याने त्यातच त्यांचा दुर्दैव मृत्यू झाला.
त्या मृतदेहाचा अक्षरशः कोळसा झाला. याबाबतची माहिती लोणार पोलीस स्टेशनचे वरिष्ठ पोलीस निरीक्षक प्रदीप ठाकूर यांना मिळताच त्यांनी सहकारी पोलीस हवालदार रोहिदास जाधव, कृष्णा निकम, रवींद्र बोरे, चालक गजानन ठाकरे यांना घटनास्थळी रवाना केले.
या आगीची माहिती लोणार नगरपरिषदेचे गटनेते भूषण मापारी, पिंपळनेर _कुंडलस चे उपसरपंच गजानन मापारी यांनी घटनेची माहिती मिळताच अग्निशमक घटनास्थळी पाठविले. मात्र तोपर्यंत उशीर झाला होता.
घटनेचा पुढील तपास लोणार पोलीस स्टेशनचे वरिष्ठ पोलीस निरीक्षक प्रदीप ठाकूर यांच्या मार्गदर्शनाखाली बन्सी पवार व कृष्णा निकम करीत आहेत.
