शिरूर : महान्यूज लाईव्ह
पिंपरखेड ता . शिरूर येथे दिवसाढवळ्या बँकेवर दरोडा टाकून चोरून नेलेली अडीच कोटी रुपयांचे दागिने व रोख रक्कम असा मुद्देमाल शिरूर न्यायालयाच्या आदेशानुसार शिरूर पोलिसांकडून बँकेच्या ताब्यात देण्यात आली आहे.
पिंपरखेड येथे गेल्या वर्षी दिवसाढवळ्या महाराष्ट्र बँकेवर आरोपींनी दरोडा टाकून बँकेतील रोख रक्कम व दागिने असा एकूण २ कोटी ७९ लाख ७२ हजार ९५० रुपयांचा मुद्देमाल चोरून नेला होता.या प्रकरणी पुणे ग्रामीण गुन्हे शाखा व पुणे ग्रामीण पोलिसांनी मोठ्या कसोशीने आरोपींचा शोध घेत पाच आरोपी गजाआड केले होते.या गुन्ह्यात चोरी गेलेला मुद्देमाल व गुन्ह्यात वापरलेली वाहने पोलिसांनी जप्त केली होती. दरम्यान या दरोड्यातील जप्त केलेले २ कोटी २९ लाख किमतीचे सोन्याचे दागिने व २२लाख १२ हजार ६९० रुपये रोख रक्कम असा एकूण २कोटी ५१ लाख १३ हजार ९८० रुपयांचा मुद्देमाल बँकेच्या ताब्यात देण्याचा आदेश शिरूर प्रथम वर्ग न्यायदंडाधिकारी यांच्याकडून देण्यात आला होता.त्यानुसार पिंपरखेड येथील महाराष्ट्र बँकेचे व्यवस्थापक मोहित चव्हाण,अखिलेश कुमार यांच्या कडे सदरील जप्त केलेला मुद्देमाल देण्यात आला.
यावेळी बँकेचे कायदेशीर सल्लागार ॲड . डी एम. सोंडेकर,व्यवस्थापक प्रशांत किसना,पोलिस पाटील सर्जेराव बोऱ्हाडे,पोलिस हवालदार दिनेश कुंभार, बाळू भवर,नितीन सुद्रिक हे उपस्थित होते.
पिंपरखेड येथील बँकेत नागरिकांनी गुंतवणूक केलेली रोख रक्कम व दागिने न्यायालयाच्या आदेशानुसार बँकेच्या ताब्यात दिल्याने दागिने व रोख रक्कम सर्वसामान्य नागरिकांना मिळणार असल्याने नागरिकांनी समाधान व्यक्त केले आहे.
