पाटस येथील महाराष्ट्र बँकेतील प्रकार!
दौंड : महान्युज लाईव्ह
दौंड तालुक्यातील पाटस येथील महाराष्ट्र बँकेतून ज्येष्ठ नागरिकांनी ६० हजार रुपये काढून पिशवीत ठेवले होते. ते पैसे अज्ञात चोरट्यांनी लंपास केल्याची घटना घडली. दरम्यान दोन संशयित महिलांची सिद्धी महाराष्ट्र बँकेच्या सीसीटीव्ही कॅमेऱ्यात कैद झाली आहे.
ही माहिती पाटस पोलिसांनी दिली. पोलिसांनी दिलेली माहिती अशी की, दिलीप शिवाजी खराडे ( वय 60) हे मंगळवारी दि. 28 ) सकाळी 11 वाजण्याच्या सुमारास महाराष्ट्र बँकेत पैसे काढण्यासाठी गेले होते. त्यांनी आपल्या खात्यातून साठ हजाराची रक्कम काढली. त्यांनी ते पैसे मोजून पिशवीत ठेवले आणि बॅंक पुस्तक भरण्यासाठी रांगेत नंबरला उभे राहिले.
त्यावेळी त्यांच्या हातातील पिशवी कापून पिशवीतील साठ हजार रुपये अज्ञात चोरट्यांनी लंपास केल्याची घटना घडली. याबात दिलीप खराडे यांनी पाटस पोलीस चौकीला फिर्याद दिली आहे. दरम्यान बँकेत त्यांच्या पाठीमागे दोन संशयित महिला उभ्या होत्या. त्यांनी पिशवी कापुन चोरी करून साठ हजार रुपये लंपास केले असल्याचे बॅंकेच्या सीसीटीव्ही कॅमेऱ्यात कैद झाले आहे.
या दोन महिलांनी एकापाठोपाठ बँकेत प्रवेश केल्याचेही सीसीटीव्ही कॅमेऱ्याच्या फुटेजमध्ये दिसत आहे. दरम्यान, या महिला बँकेच्या खातेदार नाहीत, परंतु बँकेत प्रवेश करून असे काही जण ज्येष्ठ नागरिक व महिला यांना हेरून त्यांच्याकडील पैसे चलाखीने चोरुन लंपास करत असल्याच्या प्रकारात वाढ झाली आहे.
त्यामुळे बँकेत पैसे काढताना किंवा भरताना आजूबाजूला अनोळखी व्यक्ती दिसल्यास आपले पैसे काळजीपूर्वक व सुरक्षित ठेवावेत. याची दक्षता नागरिकांनी घ्यावी. तसेच संशयित व्यक्ती आढळून आल्यास त्वरित पोलिसांची संपर्क साधावा असे आवाहन पाटस पोलिसांनी केले आहे.
