शिरूर : महान्यूज लाईव्ह
पुणे नगर महामार्गावर बोऱ्हाडेमळा झालेल्या अपघातात घोडगंगा सहकारी साखर कारखान्याचे उपाध्यक्ष रंगनाथ थोरात हे गंभीर जखमी झाले आहेत.
याबाबत मिळालेल्या प्राथमिक माहितीनुसार, घोडगंगा सहकारी साखर कारखान्याचे उपाध्यक्ष ॲड.रंगनाथ थोरात हे कारखान्याच्या कामानिमीत्त कारखान्याच्या इनोव्हा कार या वाहनातून (एम एच १२ केजी ७६९९) पुण्याला गेले होते. त्या गाडीचे चालक अप्पा मेंगवडे हे गाडी चालवित होते.
तेथून परतत असताना त्यांचे वाहन बोऱ्हाडेमळ्यातील चौकात आले असताना एक मोटार अचानक रस्त्यात आल्याने तीला वाचविण्याच्या प्रयत्नात मेंगवडे यांचा मोटारीवरील ताबा सुटला व ती विरूद्ध दिशेला येऊन पुण्याकडे जाणाऱ्या स्कॉर्पिओ (क्र. एमएच २३ एमपी ९०) जीपवर आदळली.
यात ॲड. रंगनाथ थोरात व चालक मेंगवडे यांच्यासह स्कॉर्पिओतील नऊजण जखमी झाले. ही धडक इतकी जोराची होती की, दोन्ही वाहनांच्या पुढील भागाचे चक्काचूर मोठे नुकसान झाले. अपघातानंतर दोन्ही वाहने रस्त्यातच पलटी झाल्याने पुणे – नगर महामार्गावर वाहतूक कोंडी झाली होती. घटनेची माहिती कळताच शिरूर पोलिसांनी घटनास्थळी धाव घेतली.
या अपघातात ॲड. रंगनाथ भागुजी थोरात (वय ६१, रा. आमदाबाद, ता. शिरूर) यांच्यासह त्यांच्या वाहनाचा चालक अप्पा मेंगवडे (वय ३०, रा. माठ, ता. श्रीगोंदा, जि. नगर) व दुसऱ्या वाहनातील गणेश शिवदास पोकळे (वय ४०), स्वाती गणेश पोकळे (वय ३२), ओमराज रमेश पोकळे (वय १२) व शरद सर्जेराव पोकळे (वय ३०), अंजू शिवदास पोकळे (वय ७०), राघोबा अर्जुन मेघवंडे (वय ४२), विमल जनार्दन भावटनकर (वय ४७), दिव्या प्रदीप सुरवसे (वय ४५), सारीका रमेश पोकळे (वय ३८, सर्व रा. बीड) हे जखमी झाले.
यातील ॲड. थोरात यांच्यासह काही जखमींवर शिरूरमधील खासगी रूग्णालयात उपचार चालू असून, काही गंभीर जखमींना पुढील उपचारासाठी पुण्यातील रूग्णालयात हलविण्यात आले असल्याची माहिती मिळाली आहे.
