शिरुर : महान्यूज लाईव्ह
शिरूर पोलिस स्टेशन मधील पोलिस कोठडीत अटकेत असलेल्या घरफोडीतील आरोपीने पोलिस कोठडीतून पलायन केल्याची घटना बुधवारी (दि.२२ रोजी) सकाळी उघडकीस आली.
रेवण उर्फ रोहन उर्फ बट्टी बिरु सोनटक्के (वय २३.रा. वारजे माळवाडी पुणे) असे कोठडीतून पलायन केलेल्या आरोपीचे नाव आहे. याबाबत पोलीसांनी दिलेल्या माहितीनुसार रेवण सोनटक्के याला शिक्रापूर पोलिसांनी घरफोडीच्या गुन्हयाप्रकरणी अटक केली होती.
त्याची शिरूर पोलिस स्टेशन येथील कोठडीत रवानगी करण्यात आली होती. आरोपी रेवण हा शिरूर पोलिस स्टेशनच्या कोठडीत अटकेत असताना २२ जूनच्या रात्री शिरुर पोलीस ठाण्यातील कोठडी मधून कौले उचकटून पळून गेला. यानंतर हा प्रकार शिरूर पोलिसांच्या लक्षात आल्यानंतर तातडीने त्याला शोधण्यासाठी पोलिसांची पथके रवाना करण्यात आली.
दरम्यान या प्रकरणी आरोपी रेवण याला पळून जाण्यास मदत केल्या प्रकरणी अक्षय काळे (रा. चिंचोडी पाटील , अहमदनगर) यांच्यावर गुन्हा दाखल करण्यात आला आहे.
घटनेची माहिती कळताच उपविभागीय पोलिस अधिकारी यशवंत गवारी यांनी शिरूर पोलिस स्टेशन येथे भेट दिली असून पोलिसांना योग्य त्या सूचना दिलेल्या आहेत. या प्रकरणी पुढील तपास पोलीस निरीक्षक सुरेशकुमार राऊत यांच्या मार्गदर्शनाखाली सहाय्यक पोलीस निरीक्षक संदिप यादव करत आहेत.
