सोनी : महान्यूज लाईव्ह
माजी सैनिक असलेल्या वडिलांच्या ८० व्या वाढदिवशी ८० झाडे लावून पोलीस अधिकारी कन्येने आपल्या वडिलांना मानवंदना देतानाच सामाजिक आणि पर्यावरणाचे भानही राखले आहे. सांगलीजवळील सोनी येथील अरविंद गणपती पाटील माजी सैनिक आहेत. रविवार दि १२ जून रोजी त्यांचा ८० वा वाढदिवस होता. या निमित्ताने मुंबई येथे पोलीस दलात पीएसआय पदावर कार्यरत असणाऱ्या त्यांच्या कन्या नूतन पाटील यांनी सोनी येथे ८० झाडांचे वृक्षारोपण करून अनोख्या पद्धतीने वाढदिवस साजरा केला.
सध्या झाडांची संख्या कमी होताना दिसत आहे. ग्रामीण भागात शेतीसाठी झाडांच्या सावली मुळे पिकांचे उत्पादन कमी होते या समजा मुळे वृक्ष संख्या कमी होताना दिसत आहे. त्यामुळे झाडांची संख्या वाढविण्याच्या हेतूने हा उपक्रम हाती घेतल्याचे नूतन पाटील यांनी सांगितले.
सोनी येथे करोली रोडवर असणाऱ्या ग्राउंडची यासाठी निवड करण्यात आली. पहाटे चालायला जाणाऱ्या नागरिकांची संख्या या रोडवर जास्त असते त्यामुळे या ठिकाणी वड, पिंपळ, जांभूळ व करंज यांसारख्या प्राणवायू देणाऱ्या देशी वाणाच्या झाडांची लागवड करण्यात आली आहे.
वाढदिवसाच्या निमित्ताने गावातील स्पर्धा परीक्षेची तयारी करणाऱ्या युवकांच्या आभ्यासिकेसाठी खुर्च्या देखील देण्यात आल्या.
या कार्यक्रमासाठी सोनी येथील न्यू इंग्लिश स्कूलचे प्राचार्य व शिक्षक यांचे सहकार्य लाभले.या निमित्ताने सोनी येथील माजी सैनिक संघटनेचे व जगदंब युवा प्रतिष्ठान चे सर्व सदस्य, मिरज तालुका राष्ट्रवादी कांग्रेस चे जयसिंग चव्हाण, माजी सरपंच सुरेश मुळीक, गजानन पाटील, तसेच श्री पाटील यांच्या कन्या व परीवारातील सदस्य , गावातील विकास सोसायटीचे सदस्य जयसिंग यादव, संजय माने, सुधीर जाधव, अंकुश पाटील, अशोक पाटील, पी. बी. पाटील (सर), रघुनाथ कुंभार व दिनकर पाटील जनसेवा केंद्राचे दीपकराव चव्हाण उपस्थित होते.
