माणिक पवार
भोर : महान्यूज लाईव्ह
बहिणीचे लग्नाच्या निमित्ताने पुण्यामध्ये कपडे खरेदी करण्यासाठी निघालेल्या भावावर काळाने घाला घातला असून पुणे-सातारा महामार्गावर पाठीमागून ट्रकला धडक तरुण जागीच ठार झाला असून दुसरा एकजण गंभीर जखमी झाला आहे. या घटनेमुळे खंडाळा तालुक्यातील शिंदेवाडी गावामध्ये शोककळा पसरली आहे.
अजय रामचंद्र पिलावरे, वय २४, रा. शिंदेवाडी ( ता. खंडाळा सातारा ) असे अपघातात ठार झालेल्या तरुणाचे नाव असून त्याच गावातील गौरव हिरामण जाधव हे जखमीचे नाव असून ही घटना ( ता. भोर ) येथील एका पेट्रोल पंपासमोर सातारा पुणे महामार्गावर दुपारी सव्वा बारा वाजण्याच्या सुमारास घडली आहे. यावेळी प्रवास करणाऱ्या प्रवाशांनी जखमींना नसरापूर येथील सिद्धिविनायक हॉस्पिटलमध्ये उपचारासाठी नेले होते. मात्र दोघांची प्रकृती गंभीर असल्याने पुणे येथील भारती हॉस्पिटलमध्ये उपचारासाठी नेत असताना यात अजय पिलावरे याचा मृत्यू झाला.
अधिक माहिती अशी की, अजय पिलावरे याच्या बहिणीचे येत्या सहा जूनला लग्न असून त्यानिमित्ताने स्वतःच्या व घरातील मंडळीचे कपडे खरेदी करण्यासाठी त्याचा मित्र गौरव समवेत ते पुण्याला दुचाकीवरून निघाले होते. यावेळी गॅस टाकीने भरलेला ट्रक महामार्गावरून जात असताना इंडिकेटर न लावता ट्रक अचानक सेवा रस्त्याला वळविला. यावेळी पाठीमागून येणारी दुचाकी ट्रकच्या मधोमध जोरदार धडकली. यात अजय याचे मृत्यू झाला तर गौरव याच्यावरती उपचार सुरू आहे. पुढील तपास राजगड पोलिस करीत आहे.
