राजेंद्र झेंडे
दौंड : महान्युज लाईव्ह
कर्नाटक राज्यातील गुलबर्गा येथे पोलीस भरती ( फौजदार ) घोटाळ्यातील फरार मुख्य आरोपींना यवत व पाटस पोलीसांनी पाठलाग करीत ताब्यात घेतले ! पुणे सोलापूर राष्ट्रीय महामार्गावर पाटस टोल नाक्यावर हा थरारक पाहिला मिळाला.
रुद्र गौडा देवेंद्रप्पा पाटील ( वय ३७ रा.सौन्नागाव, तालुका अफजलपुर , जिल्हा गुलबर्गा ), मल्लिकार्जुन सिद्धांना मेळाकुंदी (वय 37, राहणार बिदनोर, तालुका अफजलपुर जिल्हा गुलबर्गा) अशी अटक केलेल्या आरोपींची नावे आहेत. कर्नाटक राज्यातील गुलबर्गा येथील पोलीस भरती घोटाळ्यातील मुख्य आरोपी हे कर्नाटक राज्य पार करून महाराष्ट्राच्या हद्दीतुन पुणे सोलापूर राष्ट्रीय महामार्गावरुन पुणे दिशेला जात असल्याची माहिती गुलबर्गा जिल्हाचे पोलीस अधीक्षक यांनी पुणे ग्रामीण पोलीस अधिक्षक डॉ अभिनव देशमुख यांना कळवली. पुणे ग्रामीण पोलीस अधीक्षक डॉक्टर अभिनव देशमुख यांनी याबाबत यवत पोलीस निरीक्षक नारायण पवार व पाटस पोलिस चौकीचे सहाय्यक पोलीस निरीक्षक केशव वाबळे यांना कारवाईचे आदेश दिले.
त्यानुसार शनिवारी ( दि.२३ ) पोलीस निरीक्षक नारायण पवार आणि सहाय्यक पोलीस निरीक्षक केशव वाबळे यांनी क्षणाचाही विलंब न लावता पोलिस कर्मचाऱ्यांचा फौज फाटा पाटस टोल नाका परिसरात तैनात केला. पाटस पोलीस चौकीचे पोलीस हवालदार संदीप कदम, भानुदास बंडगर, संजय देवकाते,पोलीस नाईक घनश्याम चव्हाण, पोलीस शिपाई समीर भालेराव, गणेश मुटेकर,दत्तात्रय टकले,यवतचे सहाय्यक फौजदार बापू जाधव, पोलीस नाईक संदिप देवकर, दत्तात्रय काळे, पोलीस शिपाई मारुती बाराते आदींनी पाटस टोल नाका परिसरात सापळा रचला आणि माहिती मिळाल्याप्रमाणे सिफ्ट वाहन ( क्रमांक के ए ३२ पी ६३४३ ) हे वाहन सोलापूर बाजुकडून भरधाव वेगाने येत असल्याचे निदर्शनास आले. त्यावेळी पोलिसांनी हे थांबण्याचा इशारा दिला मात्र पोलीसांना समोर पाहताच वाहनचालकाने गाडी भरधाव वेगाने घेत टोल नाक्याची लेन तोडुन पळून जाण्याचा प्रयत्न केला. मात्र पोलिसांनी व टोल नाका कर्मचाऱ्यांनी पाठलाग करत या वाहनास पकडले आणि या वाहनांमधील दोन मुख्य आरोपींना ताब्यात घेतले.
या दोघांविरुद्ध पोलीस ( पीएसआय ) भरती मध्ये घोटाळा केल्या प्रकरणी गुलबर्गा येथील पोलीस स्टेशला गुन्हा दाखल होता. यवत पोलिसांनी ताब्यात घेतल्या या आरोपींना गुलबर्गा पोलीस निरीक्षक रघुवीर सिंग ठाकूर यांच्या ताब्यात दिले आहे. दरम्यान, कर्नाटक राज्यातील गुलबर्गा येथुन गुलबर्गा पोलीसांच्या हातावर तुरी देऊन फरार झालेल्या पोलीस भरती घोटाळ्यातील या मुख्य आरोपींना पकडण्याची धडाकेबाज कामगिरी यवत आणि पाटस पोलीसांनी केली. या कामगिरीबद्दल ग्रामीण पोलीस अधीक्षक डॉक्टर अभिनव देशमुख आणि गुलबर्गा पोलीस अधीक्षक यांनी कौतुक केले असून अभिनंदन केले आहे..
