सुरेश मिसाळ
इंदापूर : महान्यूज लाईव्ह
इंदापूर शहरातील पंतप्रधान आवास योजनेअंतर्गत तब्बल ५८८ घरकुले नुकतीच मंजूर झालेली आहेत. परंतु जागेअभावी ही घरकुले बांधण्यासाठी मोठी अडचण निर्माण झाली होती. मात्र राज्यमंत्री दत्तात्रय भरणे यांनी आज जिल्हाधिकारी डॉ. राजेश देशमुख व इंदापूर शहर राष्ट्रवादी काँग्रेसच्या शिष्टमंडळाची एकत्रित बैठक घेत हा प्रश्न निकाली लावला. आता मंजूर घरकुल बांधण्याचा मार्ग मोकळा झाला असून लवकरच हा प्रकल्प पूर्ण होवून मंजूर घरकुल धारकांना आपले स्वतःचे हक्काचे घर मिळणार आहे.
आज पुणे येथे राज्यमंत्री दत्तात्रय भरणे यांनी जिल्हाधिकारी डॉ. राजेश देशमुख, इंदापूर शहर राष्ट्रवादी काँग्रेसचे शिष्टमंडळ यांच्या झालेल्या बैठकीमध्ये गट नंबर १५७/३ मधील एकूण ०१ क्षेत्र पैकी ०.९० आर इतके क्षेत्र पंतप्रधान आवास योजनेअंतर्गत मंजूर झालेली घरकुले बांधण्यासाठीसाठी हस्तांतरित करण्यात आले आहे. सदरील जागा हस्तांतरणाचे पत्र राज्यमंत्री दत्तात्रेय भरणे व जिल्हाधिकारी राजेश देशमुख यांचे हस्ते इंदापूरचे तहसीलदार श्रीकांत पाटील नगरपालिकेचे मुख्याधिकारी श्री कापरे व शहर स्तरीय तांत्रिक कक्ष अभियंता प्रसाद देशमुख यांच्याकडे सुपूर्द करण्यात आले. या जागेवर तब्बल ५८८ घरकुले बांधण्यात येणार आहे.
इंदापूर शहरातील आर्थिक दुर्बल घटक व बेघर नागरिकांना याचा खूप मोठा लाभ होणार आहे. त्यामुळे येणाऱ्या काळात इंदापूर शहरातील सामान्य नागरिकांना स्वतःचे हक्काचे घर उपलब्ध होणार असून या सर्व लाभार्थ्यांनी राज्यमंत्री दत्तात्रय भरणे यांनी जागेचा प्रश्न तात्काळ मार्गी लावल्याने समाधान व्यक्त केले आहे.
यावेळी इंदापूर शहर राष्ट्रवादी काँग्रेसचे अध्यक्ष बाळासाहेब ढवळे, नगरसेवक अनिकेत वाघ, अतुल शेटे पाटील, राष्ट्रवादी युवक काँग्रेसचे शहराध्यक्ष इमरान शेख तसेच सामाजिक युवा नेते नितीन जगताप आदी यावेळी उपस्थित होते.
