बारामती : महान्यूज लाईव्ह
बारामतीत शिक्षण घेणाऱ्या एका विद्यार्थ्याचे जबरदस्तीने अपहरण करून त्याला जीवे मारण्याचा प्रयत्न करण्यात आला. बेशुद्धावस्थेत त्याला माळशेज घाटात टाकून देण्यात आले होते. या प्रकरणी बारामती तालुका पोलीस स्टेशनमध्ये सहाजणांविरोधात गुन्हा दाखल करण्यात आला आहे.
नितीन बाळासाहेब कदम असे या विद्यार्थ्याचे नाव आहे. नितीन मुळचा माढा येथील असून सध्या बारामतीतील महाविद्यालयात शिक्षण घेत आहे. त्याच्याकडे असलेली एम एच ४२ एक्स ९२९६ या क्रमांकाची स्कार्पियो गाडी त्याने त्याच्याच ओळखीच्या मनोज उर्फ बंडू रामदास मुळे याला विकली. हा व्यवहार ऑगस्ट २०२० मध्ये झाला. नोटरीव्दारे व्यवहार करून ही गाडी मुळे यांच्या ताब्यात देण्यात आली. परंतू मुळे याने व्यवहारात ठरल्याप्रमाणे पुर्ण पैसे दिले नाही. त्यामुळे नितीनने टीटी फॉर्मवर सह्या केल्या नाहीत. तसेच त्याने मुळे याच्याविरोधात टेंभुर्णी व सोलापूर येथे पोलिसात अर्जही दिला होता. मुळे यावरून नितीन कदमला धमकावत होता.
रविवारी ( दि. २१ ) रोजी नितीन हा बारामतीतील एका जीममध्ये व्यायाम करत असताना मुळे हा अन्य पाच साथीदारांसह तिथे आला. त्याने नितीनला तु मुलीची छेड काढली आहेस असे सांगून भिगवण पोलीस स्टेशनला चलण्यास सांगितले. त्यानंतर त्याला जबरदस्तीने स्कॉर्पियो गाडीत बसविण्यात आले.
भिगवणकडून करमाळा रस्त्याकडे त्यांनी गाडी नेली. रात्री नऊ वाजता त्याच्याकडील मोबाईल काढून घेतला. त्याला टीटी फॉर्मवर सह्या करण्यास सांगितले. परंतू त्याने नकार दिल्याने त्याच्या डोक्यात लोखंडी टॉमी मारली. टीटी फॉर्मवर जबरदस्तीने त्याच्या अंगठ्याचा ठसा उमटविला. त्यानंतर दोरीने नितीनला बांधण्यात आले. त्याच्या चेहऱ्यावर टॉवेल टाकण्यात आला.
त्यानंतर मुळे याने नितीनचा गळा दोरीने आवळल्याने तो बेशुद्ध पडला. त्याला जाग आली त्यावेळी तो माळशेज घाटात होता. अर्थात त्याला त्यावेळी ते माहिती नव्हते. तो घाटातून चालत गेल्यावर त्याने रस्त्यावर असलेल्या कामगारांना विचारल्यावर तो आंबे कॉर्नर, माळशेज घाटात असल्याचे त्याला कळाले. त्यानंतर एका ट्रकचालकाची मदत घेऊन तो टोकावडे पोलिस स्टेशनला गेला. तेथून त्याने फोन करून कुटुंबियांना सगळी घटना सांगितली. प्राथमिक उपचारानंतर त्याने बारामतीत आल्यावर फिर्याद दिली.
