स्वच्छ सर्वेक्षण स्पर्धेमध्ये प्रथम क्रमांक मिळवण्यासाठी सहकार्य करा – नगराध्यक्षा अंकिता शहा व मुख्याधिकारी रामराजे कापरे यांचे आवाहन
सुरेश मिसाळ : महान्यूज लाईव्ह
इंदापूर : इंदापूर नगर परिषदेला स्वच्छ सर्वेक्षण स्पर्धेअंतर्गत मिळालेल्या बक्षीस रकमेतून खरेदी केलेल्या जेटिंग मशीनचे इंदापूर शहरातील लोकमान्यनगर येथे प्रात्यक्षिक करण्यात आले.
याप्रसंगी नगराध्यक्षा अंकिता शहा, मुख्याधिकारी रामराजे कापरे, इंदापूर तालुका शिक्षण प्रसारक मंडळाचे सचिव मुकुंदशेठ शहा व नगरपरिषदेचे आरोग्य विभागातील अधिकारी व कर्मचारी उपस्थित होते.
या जेटिंग मशीनद्वारे शहरातील गल्लीबोळातील तुंबलेल्या गटारी व चेंबरची साफ सफाई करण्यात येणार आहे. तसेच या मशीनद्वारे रोगराईच्या काळामध्ये औषध फवारणी करण्याची सुद्धा सोय आहे. त्यामुळे भविष्यात शहरातील साफसफाई व औषध फवारणी करण्याकरिता या मशीनचा अत्यंत उपयोग होणार आहे.
मागील पंधरा दिवसापूर्वी सक्शन मशीन वाहन खरेदी करण्यात आले आहे. त्याद्वारे शहरातील सार्वजनिक तसेच खाजगी शौचालयाच्या टाकीतील मैला उपसण्यासाठी याचा उपयोग होणार आहे. मागील चार पाच वर्षापासून इंदापूर नगरपरिषद स्वच्छ सर्वेक्षण स्पर्धेअंतर्गत सलग मिळालेल्या मानांकनामुळे बक्षीस रुपी मिळालेल्या रकमेतून ही वाहने खरेदी करण्यात आली असून अजून काही वाहने खरेदी करण्यात येणार असल्याचे नगरपालिकेच्या वतीने सांगण्यात आले.
इंदापूर शहरातील सर्व नागरिकांनी स्वच्छतेबाबत केलेल्या सहकार्यामुळेच आज आपल्या शहराचे व नगर परिषदेचे नाव देशपातळीवर नोंदले गेले आहे. येथून पुढेही सर्व नागरिकांनी स्वच्छतेसंबंधी जागरूक राहून स्वच्छ सर्वेक्षण स्पर्धेमध्ये प्रथम क्रमांक मिळवण्यासाठी इंदापूर नगरपरिषदेस सहकार्य करावे व स्वच्छ सर्वेक्षण स्पर्धेमध्ये सर्वांनी सहभाग नोंदवावा असे आवाहन नगराध्यक्षा अंकिता शहा व मुख्याधिकारी रामराजे कापरे यांनी केले.
