सुरेश मिसाळ
इंदापूर : महान्यूज लाईव्ह
शेतकऱ्यांनी पिकवलेला शेतमाल जुन्या पाणंद रस्त्यांमधून बाजारपेठेत नेण्यासाठी शेतकऱ्यांना जुन्या कच्च्या रस्त्यामुळे कसरत करावी लागत होती. शेतकऱ्यांचा शेतमाल बाजारपेठेत वेळेत पोहोचावा, यासाठी इंदापूर तालुक्यात मातोश्री ग्रामसमृद्धी शेत रस्ते योजनेतून जवळपास २५ कोटी रुपयांचे १०० किलोमिटर अंतराचे पाणंद रस्ते होणार असल्याची माहिती राज्यमंत्री दत्तात्रय भरणे यांनी दिली.
या पाणंद रस्त्यांमुळे इंदापूर तालुक्यातील खेड्यापाड्यातील दळणवळण वेगाने वाढणार असून शेतकऱ्यांना आपला शेतमाल शहरात व दुसऱ्या तालुक्यात पाठवण्यासाठी वेळेची बचत होणार आहे. राज्यमंत्री दत्तात्रय भरणे यांची शेतकऱ्यांबद्दलची तळमळ व दूरदृष्टी महत्त्वाची मानली जात आहे.
याबाबत अधिक माहिती देताना मंत्री भरणे म्हणाले,इंदापूर तालुक्यातील विविध गावांमधील ७२ ठिकाणच्या रस्त्यांना मंजुरी घेतली आहे.तालुक्यात जवळपास ९८.५ किलोमिटर अंतराचे रस्ते करण्यात येणार आहेत.या रस्त्यांसाठी रोजगार हमी योजनेतून मजुरीसाठी निधी उपलब्ध करण्यात आला आहे.या कामासाठी प्रत्येक किलोमीटरकरिता साधारणपणे २५ लाख इतका कमी अधिक प्रमाणात अंदाजपत्रकीय खर्च असतो, या प्रमाणे इंदापूर तालुक्यातील पाणंद रस्त्याकरिता जवळपास २५ कोटी रुपये इतक्या किंमतीचे रस्ते होण्यास मदत होईल. शेतकऱ्याच्या शेतामध्ये वाहने गेल्यास शेतमाल वेळेवर बाजारपेठेत पोहोचण्यास मदत होईल.
या योजनेतून तालुक्यातील होणारे पाणंद रस्त्याची माहिती पुढील प्रमाणे, कंसातील आकडे हे किलोमीटर चे आहेत… अंथूर्णे (३), अजोती (१.५), कचरवाडी (२), कडबनवाडी (४),काझड (४.५), कळंब (१), कळस (१.५), कालठण नंबर २ (३.५), कुरवली (२), गोतंडी (५), गिरवी(२), चाकाटी (७), निमगाव केतकी (४.५), जाधववाडी (१.५), जाचकवस्ती (१.५) झगडेवाडी (५), लोणी देवकर (१), वडापुरी (१.५), वरकुटे खू.(२.५), शहा (१.५), शेळगाव (१),सणसर (१.५), सपकळवाडी (१.५), सरडेवाडी (१.५), सराफवाडी (१.५), हागारेवाडी (१), पिंपरी बु.(१.५), पिटकेश्वर (अर्धा), पिठेवाडी (२), पोंधवडी (१.५), बाभूळगाव (२), बिजवडी (अर्धा), मदनवाडी (१), माळवाडी (१.५), लाकडी (१.५), लासूर्णे (१.५), लुमेवाडी (२), तक्रारवाडी (१.५), तरटगाव (१.५), निमसाखर (५.५), पिंपरी खु.(३), निरगुडे(१.५), निरनिमगाव(१.५),न्हावी(२),पंधारवाडी(१) व पळसदेव(१.५) येथे रस्ते होणार आहेत.
