मुंबई : महान्यूज लाईव्ह
उद्यापासून ( ७ मार्च ) तीन दिवस महाराष्ट्रातील बहुतांश भागात अवकाळी पाऊस पडण्याचा अंदाज हवामान खात्याने वर्तवला आहे. यामध्ये मुंबई आणि पुणे जिल्ह्याचाही समावेश आहे.
सध्या बंगालच्या उपसागरात कमी दाबाचे क्षेत्र तयार झाले आहे. त्यामुळे दक्षिण भारतातील भागात पावसाला सुरुवात झाली आहे. याच जोडीला उत्तरेकडील चक्री वाऱ्यांमुळे उत्तरेकडील भागातही पावसाची शक्यता आहे. यामुळे उद्या ७ मार्चला उत्तर महाराष्ट्र व उत्तर विदर्भात तर ८ व ९ मार्चला महाराष्ट्रातील अनेक भागात पाऊस पडण्याची शक्यता आहे.
मुंबई, पुणे, अहमदनगर, कोल्हापूर, सातारा, औरंगाबाद, जालना, परभणी, बीड, नांदेड, अकोला, अमरावती, बुलढाणा, चंद्रपूर, गडचिरोली, नागपूर, वर्धा, वाशीम, यवतमाळ, धुळे, नंदुरबार, नाशिक, जळगाव जिल्ह्यात पाऊस अपेक्षित आहे.
बंगालच्या उपसागरातील कमी दाबाचे क्षेत्र ईशान्येकडे सरकत आहे. अशा स्थितीत हवामान खात्याचे तज्ञ कृष्णानंद होसाळीकर यांच्या मते ७ ते ९ मार्च दरम्यान महाराष्ट्र, गुजरात, पुर्व राजस्थान आणि पश्चिम मध्य प्रदेशात मेघगर्जनेसह पाऊस पडेल.
