नगर : महान्यूज लाईव्ह
शाळेत उच्च माध्यमिक विद्यालयात शिकणाऱ्या विद्यार्थिनीचा पाठलाग करत दोन रोडरोमिओ नी तिला गाठले आणि ‘तु मला खुप आवडतेस…मी तुला लाईक करतो… असे म्हणत एकजण तिच्याशी अश्लील भाषेत बोलू लागला. दुचाकीवरील त्याच्या मित्राने ‘तु तुझा मोबाईल नंबर माझ्या मित्राला दे’ असे बोलून अश्लील वर्तन केले.. या दोघांना कर्जत पोलीस ठाण्याचे पोलीस निरीक्षक चंद्रशेखर यादव यांनी चांगलीच अद्दल घडवली.
कर्जत येथील एका उच्च माध्यमिक विद्यालयात शिकणारी अल्पवयीन मुलगी महाविद्यालयात आली असता तिला ईश्वर जयराम हुलगुंडे (रा. खंडाळा ता. कर्जत) याने हातवारे करून खुणावले. मात्र याकडे दुर्लक्ष करत ती मुलगी आपल्या घरी निघून गेली. त्यानंतर दोन दिवसांनी कर्जत बसस्थानकावर संबंधीत मुलगा आपल्या एका मित्रासह निर्भयाजवळ आला
‘तू मला आवडतेस व मी तुला लाईक करतो’ असे म्हणत लज्जा उत्पन्न होईल अशा अश्लील भाषेत बोलून निर्भयाकडे पाहून हातवारे करू लागला. त्याचवेळी त्याच्या सोबत असलेला त्याचा मित्र मुलीजवळ येऊन म्हणाला तु तुझा मोबाईल नंबर माझ्या मित्राला दे’ असं म्हणाला.
यावेळी मुलगी यावर काहीच न बोलता पुढे चालू लागली. यावेळी दोघांनीही तिचा पाठलाग केला. भीतीपोटी तिने एका अनोळखी इसमाच्या फोनवरून आपल्या भावाला फोन करून हकीकत सांगून बसस्थानकात बोलावले. भाऊ तात्काळ त्या ठिकाणी आल्यानंतर तिने तिला त्रास देणारा मुलगा दाखवला. त्रास देणारी दोन्हीही मुले ईश्वर जयराम हुलगुंडे (रा. खंडाळा ता.कर्जत) व विजय हुलगुंडे (रा.गोयकरवाडी ता.कर्जत) अशी त्यांची नावे असल्याचे सांगितले.
त्या मुलीच्या भावाने ‘तुम्ही माझ्या बहिणीची छेड का काढली? असे विचारले असता दोघांनीही तेथून पळ काढला. ही माहिती कर्जत पोलीस ठाण्यात समजताच पोलीस निरीक्षक चंद्रशेखर यादव हे तात्काळ पोलीस अंमलदार पांडुरंग भांडवलकर, शाम जाधव, सुनील खैरे, गोवर्धन कदम, मनोज लातूरकर, अमित बर्डे यांच्यासह घटनास्थळी दाखल झाले.
आरोपींचा शोध घेतला असता ते मिळून आले नाहीत. त्यानंतर मुलगी व तिच्या भावाने कर्जत पोलीस ठाण्यात फिर्याद दाखल केली. दोन्ही आरोपींवर विनयभंग भा. द. वि. कलम ३५४ (अ) (ड) तसेच (पोस्को) बाल लैंगिक अपराध संरक्षण कायदा २०१२ चे कलम ११,१२ प्रमाणे गुन्हा दाखल करण्यात आला. पोलिस निरीक्षक चंद्रशेखर यादव यांच्या मार्गदर्शनाखाली दोन्हीही आरोपींना काही तासात अटक करण्यात आली. आता किमान 15 दिवस ते 1 महिना आरोपीना जेलची हवा खावी लागणार आहे.
चंद्रशेखर यादव, पोलीस निरीक्षक कर्जत – ‘कोणत्याही मुली-महिलांना कुणी त्रास द्यायचा प्रयत्न केला तर याद राखा,कुणाला सोडणार नाही. कोणत्याही मुलींबाबत असा प्रकार घडत असेल किंवा घडला तर तात्काळ कर्जत पोलिसांना कळवा. तक्रारदाराचे नाव गुप्त ठेऊन त्रास देणाऱ्यावर तात्काळ कायदेशीर कारवाई करण्यात येईल.
दरम्यान ही कारवाई पोलीस अधिक्षक मनोज पाटील, अपर पोलीस अधिक्षक श्री सौरभ कुमार अग्रवाल, उप विभागीय पोलीस अधिकारी आण्णासाहेब जाधव यांच्या मार्गदर्शनाखाली कर्जत पोलीस स्टेशनचे पोलीस निरीक्षक चंद्रशेखर यादव, फौजदार भगवान शिरसाठ, पोलीस अंमलदार पांडुरंग भांडवलकर, शाम जाधव, सुनील खैरे, गोवर्धन कदम, मनोज लातूरकर, अमित बर्डे यांनी केली.
