माणिक पवार
भोर : महान्यूज लाईव्ह
कोरोना काळात गरजू व्यक्तींना एका जिल्ह्यातून दुसऱ्या जिल्ह्यात जाण्याकरता ई – पास देण्याचे जबाबदारी सायबर क्राईम प्रभारी अधिकारी असलेले पोलिस निरीक्षक सचिन पाटील यांच्यावर पोलीस अधीक्षक यांनी सोपवले होते. त्यावेळी पाटील यांनी पारदर्शकपणे चोवीस तास ई – पास देण्याचे चोख काम केले होते. यांची दखल घेत पोलीस अधीक्षक डॉ. अभिनव देशमुख यांच्या हस्ते राजगडचे पोलीस निरीक्षक सचिन पाटील यांचा ग्रीन वर्ल्ड अवॉर्ड देऊन सन्मान करण्यात आले.
ग्रीन वर्ल्डने कोविड काळात पोलिसांनी केलेल्या कार्याचा आढावा घेणार्या ‘ समर्पण ‘ या चित्रफितीचे रिलीज डॉ. अभिनव देशमुख यांच्या हस्ते पोलीस मुख्यालयात करण्यात आले. यावेळी कोविडच्या दोन्ही लाटेत उत्कृष्ठ कार्य केलेले डीवायएसपी अमृत देशमुख, राजगड पोलीस स्टेशनचे पोलीस निरीक्षक सचिन पाटील, लोकल क्राईम ब्रांचचे पोलीस निरीक्षक अशोक शेळके, डीएसबीचे भाऊसाहेब पाटील, रांजणगावचे पोलीस निरीक्षक सुरेश राऊत, यवतचे पोलीस निरीक्षक नारायण पवार, खेडचे वरिष्ठ पोलीस निरीक्षक सतिश गुरव, भिगवणचे सहायक पोलीस निरीक्षक दिलीप गुरव, सहाय्यक सुनिल हिरूरकर यांना डॉ. अभिनव देशमुख व ग्रीन वर्ल्डचे अध्यक्ष गौतम कोतवाल यांच्या हस्ते सन्मानपत्र देऊन गौरविण्यात आले.
यावेळी स्पार्क ग्रुपच्या सुनिताताई पाटसकर, कमलराज ग्रुपचे संचालक मोहन थोरात, साई मोतीवाले, कुमार अन्वेकर, बारामती सहकारी बँकेचे उपाध्यक्ष अविनाश लगड, इंडस्ट्रीयल पॅकर्सचे अध्यक्ष गौरव धूत याप्रसंगी उपस्थित होते. याप्रसंगी गौतम कोतवाल बोलताना म्हणाले की, पोलिसांनी कोविड काळात केलेले कार्य अतुलनीय आहे. समाजाने त्यांच्या कार्याची दखल घेतली पाहीजे म्हणून या फिल्मची निर्मिती केली असून ही फिल्म भविष्यात अशा संकटकाळात लढताना पोलीस दलाला प्रेरणा देईल असल्याचे सांगितले. कार्यक्रमाचे आयोजन सोनल कोतवाल, शुभम साखरे, सन्मती लंवाडे, गौरी पैठणकर यांनी केले होते. सुत्रसंचालन दिंगबर ढोकळे यांनी केले.
पोलीस दलातील कर्मचार्यांचा अभिमान – डॉ. अभिनव देशमुख – कोविड काळात सर्वत्र भितीचं वातावरण असताना पोलीस दलातील सर्वच कर्मचारी जीवाची पर्वा न करता रस्त्यावर उतरले. लोक घराबाहेर पडायला घाबरत असताना लॉकडाऊनची कडक अंमलबजावणी, बाहेर जाणार्या लोकांची जेवणाची व प्रवासाची सोय तर रूग्णांना घरातून उचलून त्यांना बेड मिळवून देईपर्यंत पोलीसांनी रात्रंदिवस काम केले आहे. त्यामुळे पोलीसांची प्रतिमा जनसामान्यांच्या मनात उजळली. म्हणूनच माझ्या सहकार्यांच्या या कार्याचा अभिमान वाटतो असे उद्गार पुणे ग्रामीण पोलीस अधिक्षक डॉ. अभिनव देशमुख यांनी काढले.
