बारामती : महान्यूज लाईव्ह
बारामती शहरात मोटार सायकल चोरी झाल्याच्या तक्रारी पोलीस स्टेशनला येतात. पण ज्यावेळी या चोरीचा तपास सुरु होतो, त्यावेळी चोरी झालेल्या ठिकाणी दुसरी मोटारसायकल उभी असल्याचे आढळून येते. जानेवारी व फेब्रुवारी महिन्यात असे पाच प्रकार घडल्याचे निदर्शनास आले आहे. या पाचही प्रकारात शाईन व हिरो होंडा कंपनीच्या मोटारसायकल चोरी झाल्याची तक्रार आली होती.
या पाचही ठिकाणी शाईन कंपनीच्या व हिरो होंडा कंपनीच्या गाड्या चोरी गेल्याची माहिती होती. नंतर काही वेळानंतर त्या ठिकाणी तपास करणाऱ्या पोलिस पथकाच्या असे निदर्शनास आले की दुसरी त्याच कंपनीची मोटारसायकल त्या ठिकाणी उभी आहे. नजरचुकीने लोकांनी दुसरीच गाडी त्यांची स्वतःची समजून नेली आहे. शाईन व हिरोहोंडा गाड्यांचे मॉडेल जुने झाले की त्याचे लॉक निकामी होऊन ते कोणत्याही चावीने उघडते. या कंपनीच्या गाड्यांचे लॉक असे सहजासहजी उघडत असल्याने लोकांच्या ते लक्षात येत नाही व ते स्वतःची गाडी सोडून दुसरी गाडी नेतात.
मुळ गाडीच्या मालकाला ज्यावेळी आपली गाडी सापडत नाही त्यावेळी तो पोलीस स्टेशनला तक्रार देतो. मग पोलिस पुढील तपास करतात. तोपर्यंत ज्याने चुकीने गाडी नेली त्याच्या हा प्रकार लक्षात येऊन तो घटनास्थळी येतो .
वारंवार असे प्रकार घडल्याने बारामती पोलिसांनी सर्व मोटरसायकल धारकांना याबाबत खबरदारी घेण्याची विनंती केली आहे. बारामती शहरांमध्ये आसपासच्या खेडेगावातून मोठ्या प्रमाणात लोक मोटरसायकल वर येतात. वाहने बाजारपेठेत लावतात त्याठिकाणी एक सारख्या प्रकारच्या गाड्या उभे असतात. नंतर जाताना दुसऱ्याच गाडीला चावी लावून घेऊन जातात. तरी यापुढे जुन्या झालेल्या हिरो होंडा किंवा शाईन गाड्याचे लॉक व्यवस्थित आहे का ? ते दुसऱ्याच्या चवीने उघडत नाही ना याची खात्री प्रत्येकाने करावी. बरेच लोक तर मार्केटमध्ये गाडीला चावी तसेच ठेवतात किंवा काही अशा गाड्या असतात की त्या गाड्या कोणतीही चावी न लावता चालू होतात. अशा पद्धतीने जुन्या आठ ते नऊ वर्षापूर्वीच्या गाड्यांची काळजी मालकांनी विशेष करून घ्यावी.
मार्केट मध्ये गाडी नियमित पार्किंग ठिकाणी वाहतुकीला अडथळा न करता डबल स्टँडला गाडी व्यवस्थित लावून लॉक करून मार्केटला जावे . सर्व दुकानदारांनी आपले दुकान समोर सीसीटीव्ही लावावा जेणे करून आपले ग्राहकाचे मोटरसायकल कोणी नेले ते लक्षात येईल.
अशा सूचना बारामती पोलिसांकडून मोटारसायकलस्वार तसेच दुकानदारांना करण्यात आल्या आहेत.
