माणिक पवार : महान्यूज लाईव्ह
भोर, दि. ८ – भोर तालुक्याच्या सारोळा गावाच्या हद्दीत पुणे बाजूकडे जाणाऱ्या महामार्गाच्या जवळ असलेल्या रानाझुडपात तीन रानगव्यांचे दर्शन पाहायला मिळाल्याने खळबळ उडाली आहे. वनविभागाने भोर रेस्क्यू टीमच्या मदतीने रानगव्याच्या कुटुंबाला पुन्हा जंगलात सुखरूप सोडण्यात आले. दरम्यान, महामार्गावरून प्रवास करणारे प्रवासी आणि बघ्यांची संख्या वाढल्याने मोहीममध्ये अडथळा येत असल्याने अखेर पोलिसांना पाचारण करावे लागले.
पुणे-सातरा महामार्गाच्या महामार्गावर पुणे बाजूकडे जाणाऱ्या महामार्गाच्या कडेला असलेल्या मोकळ्या पटांगणात तीन रान गावे असल्याचे नागरिकांना पाहायला मिळाले. यामुळे काही काळ घबराटीचे वातावरण निर्माण झाले होते.
किकवी येथील वनविभागाचे अधिकारी कर्मचारी यांनी घटनास्थळी धाव घेऊन रानगवे पकडण्याचा प्रयत्न केला. मात्र परिस्थिती असल्याने रानगवे पकडण्यासाठी भोर आणि नसरापूर वनपरिक्षेत्रतील पथकाला पाचारण केले. यावेळी महामार्गावरून बघ्यांची संख्या वाढल्याने भेदरलेले रानगवे रानाझुडपाच्या आड दबा घेऊन बसले होते. अखेर यशस्वी मोहीम राबवून वनविभागाने तिन्ही रानगव्यांना जंगलात सुखरूप सोडले.
रानगवे पकडण्यासाठी वनविभाग, महामार्ग पोलिस आणि भोर रेस्क्यू टीम यांनी युद्धपातळीवर मोहीम सुरू केली आहे. मात्र पुणे-सातारा महामार्गावर जाणारे प्रवासी उत्सुकतेपोटी त्याठिकाणी थांबले होते. यामुळे पुणे बाजूकडे जाणाऱ्या महामार्गावर संथगतीने वाहतूक झाल्याने कोंडी निर्माण झाली होती. तसेच बघ्यांची संख्या वाढल्याने मोहीममध्ये अडथळा येत होता. बघ्यांना हटवण्यासाठी आणि वाहतूक कोंडी सुरळीत करण्यासाठी महामार्ग वाहतूक पोलिसांना पाचारण करावे लागले.
