जालना : महान्यूज लाईव्ह
नदी पात्र दुथडी भरून वाहून पुलावरून पाणी वाहत जात असताना पुलावर दुचाकी घेऊन स्टंट करणे एका युवकाला चांगलेच महागात पडले. या घटनेत सुदैवाने तरुणाचा जीव वाचला, मात्र दुचाकी वाहून गेली.
याचा व्हिडिओ येथे पहा अथवा महान्यूज लाईव्ह फेसबुक पेज वर पाहू शकता.
गेल्या तीन दिवसांपासून जिल्ह्यात मुसळधार पाऊस सुरू आहे. त्यामुळे अनेक नदी नाले दुथडी भरून ओसंडून वाहत आहे, परतूर तालुक्यात श्रीष्ठीगावात मुसळधार पाऊस झाल्याने गावातून वाहणाऱ्या कसुरी नदीपात्रावर असलेल्या नलकांडी पुलावरून पाणी वाहू लागले.
येथे पाण्याचा वेगही अधिक होता याच पुलावर काल (ता. २३) दुपारी तीनच्या सुमारास दुचाकी घेऊन स्टंट करणे एका तरुणाला चांगलेच महागात पडले. त्याला अनेकजण पलीकडच्या काठावरील लोक सांगत असताना देखील त्यांनी दुचाकी वाहत्या पाण्यात घातली व तो पूल ओलांडू लागला.
मात्र पाण्याच्या प्रवाहामुळे दुचाकीसह पुलावरून तो नदीपात्रात वाहून गेला. सुदैवाने त्याला पोहता येत असल्याने तो पात्राबाहेर आला. मात्र त्याची दुचाकी वाहून गेल्याने त्यांला हा जीवघेणा स्टंट चांगलाच महागात पडला.
