दौलतराव पिसाळ : महान्यूज लाईव्ह
शिरवळ (ता. खंडाळा) येथील एसटी बसस्थानकातील सुलभ शौचालयाचे चालक रणजित गणपतराव जाधव (वय 40, रा. बौद्ध आळी, शिरवळ) यांचा गळा आवळून आणि डोके आपटून खू-न केल्याचे शुक्रवारी सकाळी उघडकीस आले.
या घटनेने परिसरात खळबळ उडाली असल्याने पोलिसांनी तपासाची चक्रे गतिमान केली आणि विनोद भिमराव वावळे (रा. शिरवळ मुळ रा. नाव्हा, ता. पालम, जि. परभणी) याला शिरवळ पोलिसांनी अटक केली.
मृत जाधव यांनी संशयिताच्या मैत्रिणीबाबत अपशब्द वापरल्यानेच त्यांचा काटा काढल्याचे समोर आले आहे. याबाबत पोलीस अधीक्षक अजयकुमार बन्सल यांनी अधिक दिली.
ही माहिती अशी की, 20 ऑगस्ट रोजी शिरवळ बसस्थानकात असलेल्या सुलभ शौचालयाचे चालक रणजित जाधव यांचा खू-न झाल्याची घटना समोर आली होती. शिरवळ सारख्या गजबजलेल्या शहरात ही घटना घडल्याने मोठी खळबळ उडाल्याने तपासाची चक्रे गतिमान करण्यात आली होती.
शिरवळ पोलीस, एलसीबीचे पथक समांतर तपास करत होते. दरम्यान संशयित वावळे यानेच जाधव यांचा खून केला असून तो परभणीला पळून जाण्याच्या तयारीत असल्याची माहिती पोलीस निरीक्षक किशोर धुमाळ यांना मिळाली होती.
धुमाळ यांनी तातडीने सहाय्यक पोलीस निरीक्षक आनंदसिंग साबळे, रमेश गर्जे यांना सुचना करून त्याला ताब्यात घेण्याबाबत कळवले होते. त्यानुसार एलसीबीच्या पथकाने शिरवळ बसस्थानक परिसरात सापळा लावला असता संशयिता वावळे अलगद पोलिसांच्या जाळ्यात सापडला.
त्याला ताब्यात घेत, शिरवळ पोलीस ठाण्यात त्याच्याकडे चौकशी केली असता, त्याने उडवाउडवीची उत्तरे दिली. त्यानंतर पोलिसांनी त्याला खाक्‍या दाखवताच त्याने दारूच्या नशेत झालेल्या वादातून जाधव यांचा खून केल्याची कबुली दिल्यावर त्याला अटक करून शिरवळ पोलिसांच्या ताब्यात देण्यात आले.
ही कारवाई पोलीस अधीक्षक अजयकुमार बन्सल, अप्पर अधीक्षक धीरज पाटील, उप विभागीय पोलिस अधिकारी तानाजी बरडे यांच्या मार्गदर्शनाखाली पोलीस निरीक्षक किशोर धुमाळ, महेश इंगळे, आनंदसिंग साबळे, रमेश गर्जे, फौजदार सागर आरगडे, सहाय्यक फौजदार उत्तम दबडे, तानाजी माने, हवालदार संतोष सपकाळ, मोहन नाचण, राजकुमार ननावरे, अजित कर्णे, निलेश काटकर, नितीन गोगावले, वैभव सावंत यांच्यासह शिरवळ पोलीस ठाण्याच्या कर्मचाऱ्यांनी केली.
